२६ साउन २०७८, मंगलबार
विश्व स्वास्थ्य संगठनले (डब्लुएचओ) ले कर्णाली प्रदेशको कमजोर स्वास्थ्य अवस्था सुधार गर्न कार्ययोजना निर्माण गरिने बताएको छ ।
नेपाल स्वास्थ्य संगठनले गर्दै आएको कामको बारेमा जानकारी दिन आज सुर्खेत वीरेन्द्रनगरमा आयोजित पत्रकार सम्मेलनमार्फत विश्व स्वास्थ्य संगठनका नेपाल प्रमुख डा. राजेश पाण्डवले कार्ययोजना बनाउन लागिएको बताउनुभयो । अन्य प्रदेशको तुलनामा कर्णालीको स्वास्थ्य अवस्था कमजोर भन्दै प्रमुख डा.पाण्डवले यो प्रदेशमा कोरोना खोप, स्वास्थ्य सामग्रीलगायतको उपलब्धता र आगामी दिनमा थाल्नुपर्ने रणनीतिका विषयमा जानकारी लिन सुर्खेत आएको जनाउनुभयो ।
“हरेक वर्गका नागरिकहरुको स्वास्थ्य राम्रो हुनुपर्दछ भन्ने मान्यता विश्व स्वास्थ्य संगठनले राख्दछ । यहाँका नागरिकहरुलाई गुणस्तरीय स्वास्थ्य सेवा दिन हामी हातेमालो गर्न तयार छौं,” प्रमुख डा. पाण्डवले भन्नुभयो, “यसका लागि संघ र प्रदेश सरकारले यहाँको स्वास्थ्य अवस्था र कस्तो ठाउँमा सहयोग गर्दा प्रभावकारी हुन्छ भन्ने तथ्याङ्कसहितको प्रतिवेदन हामीले पाउँदा काम गर्न सहज हुनेछ ।”
कर्णालीका नागरिकहरुलाई स्वास्थ्यको पहुँचमा पु¥याउनका लागि नजिकबाट त्यो अवस्था नियालिरहेको र आउने दिनमा संगठनले सहयोग गर्ने भन्दै उहाँले कोरोना महामारीको जोखिम कायमै रहेकाले यसबाट बच्न सबै पक्ष गम्भीर भएर लाग्न अनुरोध गर्नुभयो । डब्लुएचओले सोमबार कर्णाली प्रदेशका मुख्यमन्त्री शाहीलाइ १७५ थान अक्सिजन कन्सन्ट्रेटर हस्तान्तरण गरेको थियो ।
