१३ साउन २०८३, बुधबार
कर्णाली राजमार्गको कालीकोट जुम्ला सडक खण्डमा पर्ने सेराबाडामा आज सुख्खा पहिरोसहित विशाल ढुंगा खस्दा सडक अवरुद्ध भएको छ ।
खाँडाचक्र नगरपालिका ८ कालीकोट सेराबाडास्थित माथिबाट खसेको पहिरो र ढुंगाले सडक बन्द गरेपछि गाडी आवातजावत पूर्णरुपले बन्द भएको जिल्ला प्रशासन कार्यालय कालीकोटका प्रमुख जिल्ला अधिकारी झविलाल भट्टराईले जानकारी दिनुभयो । सानो मेसिनले ढुंगा फुटाल्न नसक्ने स्थिति भएपछि सडक डिभिजन कार्यालय जुम्लासँग समन्वय गरेर ठूलो एक्साभेटर मगाएको उहाँले बताउनुभयो ।
रासससँग कुरा गर्दै प्रजिअ भट्टराईले भन्नुभयो, “सडक डिभिजन कार्यालय जुम्लाको कालीकोटको टिमुरे भीरमा तयारी अवस्थामा राखिएको एक्साभेटर आउँदैछ । तीन बजेसम्म पुगिसक्छ । ढुंगा फुटाल्छौं र सडकको पहिरो पन्छाएर आजै सडक सुचारु गछौं ।” यात्रुको कठिनाईलाई बुझेर जतिसक्दो छिटो सडक खोल्ने तयारी भइरहेको उहाँले बताउनुभयो ।
तस्बिर : सामाजिक सञ्जाल ।
