११ असोज २०८०, बिहीबार
कर्णाली प्रदेशका भूमि व्यवस्था, कृषि तथा सहकारीमन्त्री भीमप्रकाश शर्माले प्राणघातक रोग रेबिजविरुद्ध जनचेतना जगाउन आवश्यक भएको बताउनुभएको छ ।
विश्व रेबिज दिवस २०८० को अवसरमा पशुपंक्षी विकास निर्देशनालय सुर्खेतद्वारा आज आयोजित कार्यक्रममा बोल्दै मन्त्री शर्माले रेबिज रोग नियन्त्रणको लागि खोप अभियानसगै जनचेतना फैलाउन आवश्यक भएको बताउनुभयो । रेबिज रोग नियन्त्रणमा खोप अभियान सञ्चालन गरेपनि जनचेतनाको कमि भएको जनाउँदै मन्त्री शर्माले कार्यालय प्रमुखसहित पशु चिकित्सकहलाई निर्देशन गर्नुभयो ।
उहाँले भन्नुभयो, “हामी मध्ये धेरैलाई रेबिज रोग प्राण घातक हो भन्ने थाहा छ । यद्यपि हामीले वेवास्ता गरिरहेका छौं । जनचेतनाको कमीले दैनिक विद्यालय पढ्ने बालबालिका, सडकमा हिड्डुल गर्ने मान्छे, मजदुरहरुले अकालमै ज्यान गुमाउनु परेको छ ।”
रेविज संक्रमण भएको पशुबाट कुकरमा रोग सर्ने र कुकरले मान्छे या अन्य जनावरलाई टोकेमा यो रोग्न लाग्ने भएकोले यसको रोकथामको लागि सरकारले विशेषरुपले ध्यान दिएको उहाँले बताउनुभयो । यसको रोकथाम तथा नियन्त्रणका लागि सबै सरोकारवालाहरुको महत्वपूर्ण भूमिका रहने उहाँको भनाई थियो ।
मन्त्री शर्माका अनुसार रेबिज रोगविरुद्ध जनचेतना र खोप नै उत्तम उपाय भएकाले हामीले पालेका जनावरहरु विशेषगरी कुकुरलाई समयमैं रेविज विरुद्धको खोप लगाउन जरुरी छ ।
