१७ चैत २०७९, शुक्रबार
कर्णाली प्रदेश सरकारका मुख्यमन्त्री राजकुमार शर्माले विश्वासको मत प्राप्त गर्नुभएको छ ।
कर्णाली प्रदेशसभाको पहिलो अधिवेशनको आज बसेको नवौ बैठकबाट मुख्यमन्त्री शर्माले विश्वासको मत प्राप्त गर्नुभएको हो । प्रदेशसभाका ३९ सदस्य मध्ये ३८ जनाले उहाँलाई विश्वासका मत दिएका थिए ।
नेकपा (माओवादी केन्द्र)का १३, नेपाली कांग्रेसका १४, नेकपा एमालेका १०, नेकपा (एकीकृत समाजवादी) पार्टीका एक र एक स्वतन्त्र प्रदेशसभा सदस्य गरी ३८ जनाले विश्वासको मत दिएका थिए । राप्रपाले मुख्यमन्त्रीको विपक्षमा मतदान गरेको थियो ।
गत माघ ६ गते एमाले, नेकपा (एकीकृत समाजवादी) र राप्रपासहितले मुख्यमन्त्री शर्मालाई विश्वासको मत दिएका थिए । राष्ट्रिय राजनीति बदलिएसँगै संघ सरकारबाट राप्रपा बाहिरिएपछि कर्णालीमा पनि फागुन १८ गते मुख्यमन्त्री शर्मा नेतृत्वको सरकारबाट राप्रपाले समर्थन फिर्ता लिएको थियो ।
दोस्रो पटक पनि उहाँले नेपालको संविधान २०७२ को धारा १८८ को उपधारा २ बमोजिम विश्वास आफूलाई विश्वास प्राप्त छ भनी सभामा प्रस्ताव पेश गर्नुभएको थियो । जसअनुरुप उहाँले प्रदेशसभाबाट दोस्रो पटक विश्वासको मत प्राप्त गरी मुख्यमन्त्री बन्न सफल हुनुभएको छ ।
