१५ मंसिर २०७९, बिहीबार
नेपाली काँग्रेसका नेता तथा कर्णाली प्रदेशका मुख्यमन्त्री जीवनबहादुर शाहीले कर्णालीमा सत्ता गठबन्धन पूर्ण बहुमतमा भएको बताउनुभएको छ ।
यही मंसिर ४ गते सम्पन्न निर्वाचनमा सत्ता गठबन्धनले अपेक्षाकृत सफलता हाँसिल गरेको उहाँले बताउनुभयो । रासससँग कुरा गर्दै मुख्यमन्त्री शाहीले भन्नुभयो, “जुम्लाबाहेक प्रतिनिधिसभा सदस्य १२ क्षेत्रमध्ये ११ निर्वाचन क्षेत्रमा सत्ता गठबन्धनले जितेको छ । प्रदेशसभामा २४ मध्य १८ सदस्य गठबन्धन भित्रकै छन् । सरकार बनाउनका लागि हामीसँग पूर्ण बहुमत छ ।”
कर्णाली प्रदेशसभामा यो चुनावबाट नेपाली काँग्रेस पहिलो पार्टी बनेको उहाँले जनाउनुभयो । काँग्रेस पहिलो पार्टी भएकोले यो पाँच दलीय गठबन्धनमा अहिले काँग्रेस नेतृत्वमै कर्णालीमा सरकार बन्ने र पछि आलोपालोको हिसाबले माओवादीले त्यसको नेतृत्व लिने उहाँको भनाई थियो ।
हिजोदेखि बनेको सत्ता गठबन्धनलाई निरन्तरता दिइने नेकपा माओवादी केन्द्रका कर्णाली प्रदेश अध्यक्ष बिमला केसीले जानकारी दिनुभयो । गठबन्धनभित्रको आपसी सहमतिमा र त्यो पनि केन्द्रीय सर्कुलर अनुसार कर्णाली प्रदेश सरकार गठनका लागि बाटो खुला हुने उहाँको भनाई थियो । सहमतिमा हुने आलोपालोको सरकारमा खासै समस्या नहुने उहाँले बताउनुभयो ।
कर्णाली प्रदेशसभा नेपाली काँग्रेस र नेकपा (माओवादी केन्द्र)ले प्रत्यक्षमा नौ÷नौ सिट जितेका छन् भने नेकपा एमालेले पाँच सीट लिएको छ । एउटा स्वतन्त्र उम्मेदवारले जितेका छन् । कर्णालीमा प्रदेशमा आएको समानुपातिक मतलाई आधार मान्दा काँग्रेस र एमालेले पाँच÷पाँच, माओवादी केन्द्रले चार, एकीकृत समाजवादी र राप्रपाले एक÷एक सीट पाउने देखिएको छ ।
यसरी आएको सीट संख्यालाई हेर्दा कर्णाली प्रदेशसभामा नेपाली काँग्रेसको १४, माओवादी केन्द्रको १३, एमालेको १०, एकीकृत समाजवादी, राप्रपा र स्वतन्त्रको गरी एक÷एक ४० सदस्यीय प्रदेशसभा रहनेछ । गठबन्धन दलभित्र २८ सदस्य संख्या हुने भएकोले कर्णलीमा सजिलैसँग सत्ता गठबन्धन दलको सरकार बन्ने सुनिश्चित भएको छ ।
