२७ कात्तिक २०७९ आइतबार
नेकपा एमालेका अध्यक्ष केपी शर्मा ओलीले गठबन्धनका शीर्ष नेतृत्वलाई प्रमुख प्रतिपक्षी दलको नेता टुङ्गो लगाउन कटाक्ष गर्नुभएको छ ।
कर्णालीका तीन जिल्लाको चुनावी आमसभालाई सम्बोधन गर्ने क्रममा सुर्खेतमा आज आयोजित जनसभालाई सम्बोधन गर्दै उहाँले मंसिर ४ गतेपछि एमाले नेतृत्वको सरकार बन्ने ठोकुवा गर्नुभयो । उहाँले नेपाली प्रधानमन्त्री शेरबहादुर देउवा र नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’प्रति कटाक्ष गर्दै भन्नुभयो, “अब प्रमुख प्रतिपक्षी दलको नेताको टुङ्गो लगाउनुस् । संभवतः ठूलो दलको हिसाबले देउवा नै दल नेता हुनुहुन्छ होला ।”
गठबन्धन दललाई संकेत गर्दै उहाँले अगाडि भन्नुभयो, “सयौं स्यालहरुको समुहले एउटा सिंहलाई घेराबन्दी गर्न सक्दैन । फुटेका हाँडा खपेटा जोडेर कुनै शक्ति तयार हुँदैन ।” गठबन्धन भनेर आ–आफ्नै घोषण पत्र बनाउनेहरुले एउटा साझा घोषणा पत्र बनाउन नसकेको टिप्पणी अध्यक्ष ओलीले गर्नुभयो ।
सम्बोधनको क्रममा उहाँले गठबन्धनलाई आगामी मंसिर ४ गतेका दिन नेपाली जनतालाई मुखभरि नभई मुखमै नअट्ने जवाफ दिन अपिल गर्नुभयो । जनताको पीर मर्कालाई बुझ्न सक्ने शक्ति एमाले भएको सुर्खेतलगायत कर्णालीका जनताले साथ दिने उहाँको जिकिर थियो ।
विकासको मूलवाहक एमाले भएको जिकिर गर्दै उहाँले एकसयबाट सुरु गरेको ज्येष्ठ नागरिक भत्ता अहिले मासिक रु.चार हजार पुगेको बताउनुभयो । पाँच पटक प्रधानमन्त्री भएका देउवालाई प्रश्न गर्दै उहाँले भन्नुभयो, “तपाई उठ्यो कि एमालेले गरेका काम देख्नुहुन्छ । तर तपाई गरेका काम के हुन् देखाई दिनुस् ।”
पाँच पल्ट प्रधानमन्त्री भएर पनि नेपालका दुईवटा छिमेकी देश मध्ये उत्तरतिर बाटो खोल्न नसकेको र त्यहाँ एमालेले आफ्नो क्षमता देखाएको भन्दै उहाँले प्रम देउवासँग काम गर्ने हुती नभएको टिप्पणी गर्नुभयो ।
माओवादी अध्यक्ष ‘प्रचण्ड’लाई विचौलियाको आरोप लगाउँदै ओलीले भन्नुभयो, “जनताको जनादेशमा जाने कुराको विरुद्धमा हिड्नु प्रतिगमन हो प्रचण्ड जी ?” ताजा जनादेशमा जानु विल्कुल संवैधानिक भएको उहाँले तर्क गर्नुभयो । ओलीले कालीकोटको रास्कोट, दैलेखको दुल्लु जम्मुकाँध र सुर्खेतको वीरेन्द्रनगको चुनावी आमसभालाई सम्बोधन गरेर ५ः०० काठमाडौं फर्कनुभएको छ ।
नेकपा एमालेका स्थायी कमिटी सदस्य तथा सुर्खेत क्षेत्र नं.(क)का प्रदेशसभा सदस्यका उम्मेदवार यामलाल कँडेलले मंसिर ४ गते एमालेको पक्षमा जनताले फैसला गर्ने बताउनुभयो । सिद्धान्त, विचार र कार्यक्रम नमिलेपनि आफ्ना स्वार्थ सिद्ध गर्न गठबन्धन नाम गरेको पार्टीसँग आफ्नो प्रतिस्पर्धा हुने उहाँको भनाई थियो ।
नेता कँडेलले भन्नुभयो, “गठबन्धन संविधान बचाउन नभई आफ्नो प्रधानमन्त्री बनाउन र एमालेलाई एक्ल्याउनका लागि हो । एक्ल्याउन खोजिएपनि एमालेले उठाएका मुद्दाका कारण विजय सुनिश्चित गर्छ ।” त्यसका लागि भने जनताले न्यायधीशको काम गर्ने उहाँको भनाई थियो ।
