२२ कात्तिक २०७९, मंगलबार
जुम्लाका युवा नेतृ लक्ष्मीकन्या बुढाद्वारा लिखित निबन्ध संग्रह ‘छरिएका खुशीहरु’ विमोचन गरिएको छ । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ र नेपाली काँग्रेसका उपसभापति पूर्णबहादुर खड्काले मंगलबार जुम्लामा संयुक्तरुपमा विमोचन गर्नुभएको हो ।
उक्त पुस्तक विमोचन गर्दै अध्यक्ष प्रचण्डले समाजको वास्तविक चरित्रलाई शब्द चित्रद्वारा प्रकाशमा ल्याएर गतिलो सन्देश दिन प्रयासरत सर्जक स्रष्टाप्रति अभारी रहेको बताउनुभयो । उहाँले भन्नुभयो, “समाजमा उपलब्ध यस्ता सृजना र प्रतिभाहरुको संरक्षण गर्नुपर्छ ।”
लेखिका बुढाले वर्तमान राजनीतिका कारण निराश भएर बसेका पूर्णकालीन कार्यकर्ता, सहिद परिवार र घाइेत अपाङ्गहरुको समस्या र अवस्थालाई शब्दमा उतार्नुभएको छ । उक्त निबन्ध संग्रहको सारले भन्छ, “अहिलेको उपलब्धि हाम्रो रगत र पसिना साटेर आएको हो । हामीले निराश होइन, खुशी हुनुपर्छ । हाम्रा छरिएका खुशीहरुको संगम एउटै हुनुपर्दछ । किनकी राष्ट्रको परिवर्तनसँग हाम्रो सम्बन्ध जोडिएको छ ।”
त्यस्तै, पिछडिएका क्षेत्रका महिलाको विद्यमान अवस्था, बालबिबाह, श्रम, कार्यबोझदेखि समाजमा भएका विकृति, साँस्कृतिक कुप्रथा र त्यसले मानवीय जीवनमा पारेका प्रभावलाई पनि निबन्ध संग्रहमार्फत उजागर गरिएको छ ।
यस अघि बुढाले लेख संग्रह ‘कर्णालीमा महिला’ भाग–१ र २ प्रकाशन गरिसक्नुभएको छ । तेस्रो कृति ‘मुक्ति अभियान’ प्रकाशन गर्नुभएका उहाँले निबन्ध संग्रह ‘छरिएका खुशीहरु’ चौथो कृतिका रुपमा प्रकाशमा ल्याउनुभएको हो । बुढा नेकपा (माओवादी केन्द्र) जुम्लाबाट प्रदेशसभाका समानुपातिकतर्फका उम्मेदवार पनि हुनुहुन्छ ।
