खलङ्गा वैशाख २४ गते, जिल्लाको गुठिचौर गाउँपालिकामा नेकपा माओवादी केन्द्रले चुनावी प्रतिवद्धता सार्वजनिक गरेको छ ।
माओवादी केन्द्रका उम्मेदवार तथा निवर्तमान अध्यक्ष हरिबहादुर भण्डारी र उपाध्यक्षका उम्मेदवार राजकन्य बुढा सहित उम्मेदवाहरुको उपस्थितिमा सार्वजनिक गरिएको प्रतिवद्धता पत्रमा गुठिचौरको विद्यालय शिक्षा निशुल्क गर्ने, हरेक माध्यामिक विद्यालयमा एक नर्स र १५ बर्षमा टोलमा डाक्टर उत्पादन गर्ने प्रतिवद्धता गरेको छ ।

गुठिचौर गाउँपालिकामा आयोजित पत्रकार भेटघाट कार्यक्रममा माओवादी गुठिचौरका अध्यक्ष लालबहादुर रावतले घोषणा गर्नुभएको प्रतिवद्धता पत्रमा गाउँपालिकालाई दुई बर्षमा पूर्ण साक्षर गाउँपालिका बनाईने प्रतिवद्धता जनाईएको छ ।

यसैगरी सरकारी सेवामा छिर्नका लागि लोकसेवा अध्ययन गर्न जेहेन्दार विद्यार्थीलाई अनुदान दिईने, जेहेन्दार विद्यार्थीलाई उच्च शिक्षा डाक्टर, पाईलट र ईन्जिनियरमा छात्रबृत्ति दिने, गुठिचौरमा १५ शैयाको अस्पताल निर्माण गर्ने, गुठिचौर बहुउद्देश्यि परियोजनालाई मुर्तता दिन पहल गरिने बताईएको छ ।

प्रतिवद्धता पत्रमा गुठिचौर गाउँपालिकाको धितामा कर्णाली स्वास्थ्य विज्ञान प्रतिष्ठानका क्याम्पसहरु स्थापना गरिने, बहुप्राविधिक शिक्षालयको स्थापना गरिने बताएको छ । प्रतिवद्धतापत्रमा ६,६ महिनामा नियमित स्वास्थ्य परीक्षण गरिनेछ ।

भौतिक संरचना भूकम्प प्रतिरोधी र अपाङ्गता मैत्री :
गुठिचौरका भवन मौलिक, भुकम्प प्रतिरोधी, अपाङ्गता तथा पर्यावरणमैत्रीमा जोड दिईने, गुठिचौरमा नमुना शहर र बस्ति विकासको गुरुयोजनाको तयार गरिने प्रतिवद्धतामा उल्लेख छ । गाउँका आन्तरिक सड्कहरु आरसिसि तथा ढल निकास गरिनेछ ।

खेलकुदमा गाउँपालिकाले सिमाचौरमा गाउँपालिका स्तरीय रंगशाला निर्माण गरिने तथा एक वडा एक खेलकुद मैदान स्थापना गर्ने बताईएको छ । यसैगरी ३ महिनामा उज्यालो गाउँपालिका घोषणा गर्ने, गाउँपालिकामा सार्वजनिक यातायात घोषणा गर्ने, एकल महिला र पुरुषको सामाजिक सुरक्षाभत्ता नियमित गर्ने, शहिद परिवारलाई एक÷ एक हजार सामाजिक भत्ता दिईनेछ ।

गुठिचौरमा कृषिमा एक घर एक बगैचालाई अनुदान दिईने, कृषिमा सस्तो ब्याजदरमा ऋण उपलब्ध गराउने छ । जडिवुटिको उत्पादन, संरक्षण, प्रर्वधन र बजारीकरणमा जोड दिईनेछ । जडिवुटि प्रशोधन केन्द्र स्थापना गरिने । सूचना क्षेत्रमा रेडियोमा गुठिचौरको क्षमता अभिबृद्धि गरिने डिजिटल गाउँपालिकामा जोड दिईने, अन्वेषण तथा आविस्कार गर्ने यूवालाई अनुदान तथा ऋण दिईनेछ।

प्रतिवद्धता पत्रमा अध्यक्षका उम्मेदवार हरिबहादुर भण्डारीले अघिल्लो ५ बर्ष विकासको केही आधार पुरा भएकाले पुरा गर्न एक पटक फेरी गुठिचौरवासीले माओवादीलाई बिजय गराउन अनुरोध गर्नुभयो ।
प्रतिवद्धता पत्र सार्वजनिक कार्यक्रमा माओवादी केन्द्रका केन्द्रीय सदस्य तथा कर्णाली प्रदेशका पूर्वमन्त्री नरेश भण्डारीले गुठिचौर माओवादीको किल्ला यथावत हुने बताउनुभयो । उहाँले गुठिचौर कुनै पनि हालतमा माओवादी वाहेक गुठिचौरमा अरुले विकास गर्न नसक्ने बताउदै यो बर्ष गुठिचौर जिल्लाको उत्कृष्ट भयो अव माओवादीले जितेमा प्रदेशकै उत्कृष्ट पालिका हुनेमा जोड दिनुभयो । गुठिचौर गाउँपालिका कार्यसम्पादनमा यस पटक जुम्लामा पहिलो भएको थियो ।

गुठिचौरमा माओवादीले २०७४ स्थानीय तहको निर्वाचनमा पनि अध्यक्षका उम्मेदवार हरिबहादुर भण्डारी र उपाध्यक्षमा जानदेवी ऐडि बिजयी हुनु भएको थियो । यस पटक माओवादीले भण्डारीलाई फेरी अध्यक्षको उम्मेदवार र राजकन्या बुढालाई उपाध्यक्षको उम्मेदवार बनाएको छ । भण्डारी पुन अध्यक्षका उम्मेदवार हुने जिल्लाकै एक मात्र उम्मेदवार हुन् ।