२२ बैशाख २०७९ बिहीबार
आसन्न बैशाख ३० गते हुने स्थानीय तह निर्वाचनका लागि जुम्ला जिल्लाका ७९ वटा मतदान स्थल र १०२ मतदान केन्द्र कायम गरिएको छ ।
जुम्लाका प्रहरी नायव उपरीक्षक नरेन्द्र चन्द्धका अनुसार सुरक्षाको दृष्किोणबाट ७९ मतदान स्थलहरूमध्ये ४१ ओटा मतदान स्थललाई अति सम्वेदनशील, १५ ओटा मतदान स्थललाई सम्वेदनशील र २३ ओटा मतदान स्थल सामान्य रहेका छन् । कसरी सुरक्षा प्रवन्ध मिलाउने भन्ने विषयमा तयारी भईसकेको छ । यति मात्र होईन दूरीको हिसाबले टाढा भएको तिला गाउँपालिकाको खोप्रीसहित चार स्थान टाढा रहेका छन् ।
मत पेटिका ल्याउन हेलिकोप्टरको माग :
प्रमुख जिल्ला अधिकारी विजयाकुमारी प्रसाईका अनुसार सुरक्षा निकायलाई मतदान गरेर सकाउन मात्रै चिन्ता छैन । मतदान पछि स्थानीय तहको निर्वाचन कार्यालयमा मतपेटिएका पुरयाउने, गणना सहित अन्तिम कार्यसम्म सुरक्षा प्रबन्धको बिषयमा जिल्ला सुरक्षा समितिले योजना बनाएको बताउनुभयो । तर ५ देखि ७ घण्टा लाग्ने खोप्रीबाट मतपेटिका ल्याउन हेलिकोप्टर आवश्यक देखिएको छ ।
प्रमुख जिल्ला अधिकारी प्रसाईले जिल्लास्थित राजनैतिक दलहरुको निर्वाचन स्वच्छ र भयरहित बनाउने विषयको वैठकमा खोप्री जस्ता जोखिम स्थानमा हेलिकोप्टरका लागि पहल गर्न राजनैतिकदलको तर्फबाट पनि पहल गर्न अनुरोध गर्नुभयो । उहाँले प्रदेश स्तरीय वैठकमा समेत खोप्रीमा हेलिकोप्टरको आवश्यक रहेकोमा जोड दिनुभयो ।
प्रहरी नायव उपरीक्षक चन्दका अनुसार तिला गाउँपालिका ९ स्थित नदैदेवी आधारभूत विद्यालय खोप्रीमा मानेचौरबाट हिडेर ६ देखि ७ घण्टा लाग्ने बताउनुभयो । त्यहाँबाट मतपेटिका तिलामा ल्याई पुग्न करिब ८ देखी ९ घण्टा लाग्ने भएकाले ध्यान दिन जरुरी रहेको छ ।
यस्तै तिला ९ कै ज्योति मा.वि राँसामालापानी र प्रस्तावित मा.वि. ढिपु पनि करिब तिला गाउँपालिकाबाट ६ घण्टा टाढा रहेको छ । यस्तै कनकासुन्दरीको मर्फानमा कनकासुन्दरीबाट ३ घण्टा लाग्ने अनुमान गरिएको छ । यस्तै जिल्लाभरमा मतगणनास्थल वा पालिका केन्द्रमा १ देखी ३ घण्टा लाग्ने धेरै स्थान छन् तर तिला ९ खोप्रीको नदैदेवी आधारभुत विद्यालयको मतदान केन्द्र जिल्लाकै सवैभन्दा टाढा रहेको छ ।
पालिकामा यस्तो छन् मतदान स्थल :
चन्दननाथ नगरपालिकामा मतदान स्थल १० वटा र मतदान केन्द्र १६ वटा, हिमा गाउँपालिकामा मतदान स्थल ९ वटा र मतदान केन्द्र ११ वटा कनकासुन्दरी गाउँपालिकामा मतदान स्थल १४ वटा र मतदान केन्द्र १५ वटा गुठिचौर गाउँपालिकामा मतदान स्थल ८ वटा र मतदान केन्द्र ९ वटा तातोपानी गाउँपालिका मतदान स्थल ९ वटा र मतदान केन्द्र १३ वटा, तिला गाउँपालिका १२ वटा र मतदान केन्द्र १३ वटा रहेको जिल्ला निर्वाचन कार्यालयले जनाएको छ ।
पातारासी गाउँपालिका मतदान स्थल १० वटा र मतदान केन्द्र १३ वटा रहेको छ । सिंजा गाउँपालिका मतदानस्थल ७ वटा र मतदान केन्द्र १३ वटा रहेको जिल्ला निर्वाचन कार्यालय जुम्लाले जनाएको छ ।
क्याप्सन: तिला गाउँपालिका खोप्री क्षेत्र तस्वीर नेत्र शाही
