१८ असार २०७८, शुक्रबार
कर्णाली प्रदेशका सामाजिक विकास मन्त्री यज्ञबहादुर बुढाक्षेत्रीले युवा समाज परिवर्तनको वाहक भएको बताउनुभएको छ ।
कर्णाली प्रदेश सरकार सामाजिक विकास मन्त्रालयद्वारा वीरेन्द्रनगर सुर्खेतमा आज आयोजित ‘सामाजिक जागरण, रुपान्तरण समृद्धिका लागि युवा परिचालन’ सम्बन्धी कार्यक्रममा बोल्दै मुलुकको समृद्धि र विकासका लागि सक्षम युवाको आवश्यक रहेको बताउनुभयो ।
मन्त्री बुढाक्षेत्रीले भन्नुभयो, “जबसम्म युवाहरु सम्पन्न हुँदैनन्, तबसम्म ‘समृद्ध कर्णाली र सुखारी कर्णाली बासी’ को नाराको आकांक्षा पुरा हुन सक्दैन । किनकी युवा समाज परिवर्तनका संवाहक हुन् ।” प्रदेश सरकारले ल्याएका विभिन्न नीति तथा कार्यक्रमहरुमा युवाहरुलाई पनि समेट्ने उहाँले प्रतिवद्धता व्यक्त गर्नुभयो ।
उहाँका अनुसार कर्णालीमा रहेका युवाहरुलाई सामाजिक, आर्थिक र खेलकुदमा सक्षम बनाउने खालका कार्यक्रमहरु सामाजिक विकास मन्त्रालयले ल्याउने छ । सामाजिक विकास मन्त्रालयका सचिव कृष्णप्रसाद काप्रीले कर्णालीको विकासमा थप टेवा पुर्याउने युवाहरुलाई आत्मनिर्भर बनाउनुपर्नेमा जोड थियो । उक्त कार्यक्रममा विभिन्न जिल्लाहरुबाट युवाहरुको सहभागिता रहेको थियो ।
