जेठ १७ जेठ २०७८, सोमबार
कर्णाली प्रदेशका मुख्यमन्त्री महेन्द्रबहादुर शाहीले खुलालुमा निर्माणाधिन पक्की चाँडो सम्पन्न गर्न निर्माण कम्पन्नीलाई निर्देशन दिनुभएको छ ।
आईतबार बेलुका कर्णाली करिडरअन्तरगत खुलालुमा पुगेर निर्माणाधिन पुलको अनुगमन गर्नुभएका मुख्यमन्त्री शाहीले निर्माण कार्य जतिसक्दो छिटो सम्पन्न गर्न निर्देशन दिनुभएको हो । पुल निर्माणको कार्य तीव्र गतिमा गएपनि कोरोना महामारीका कारण यो बीचमा सुस्ताएको तथापि ८० प्रतिशत काम भईसकेको पाईएको मुख्यमन्त्रीका प्रमुख स्वकीय सचिव कृष्णप्रसाद आचार्यले जानकारी दिनुभयो । उहाँका अनुसार कम्पनीमा काम गर्ने एक जना ईञ्जिनियर कर्णाली नदीमा खसेर र अर्को एक कर्मचारी कोभिडले मृत्यु हुँदा काम सुस्ताएको हो ।
संघीय सरकारले आगामी आर्थिक वर्षका लागि सुर्खेत–खुलालु जोड्ने सडक दुई लेन बनाउन रु.एक अर्ब २० करोड बजेट विनियोजन गरेको छ । कर्णाली प्रदेश समृद्धिको जीवनरेखाका रुपमा लिईएको कर्णाली करिडर सुर्खेत–हिल्सासम्म जोड्ने गरी पुल निर्माण कार्य भईरहेको छ । कालीकोटको शुभकालिका र नरहरिनाथ गाउँपालिका जोड्ने कर्णाली नदीमाथि निर्माण हुन थालेको पुलको कार्यसम्पन्न हुन सके सुर्खेत–हुम्ला सिधा मार्ग जोडिने छ ।
त्यसैगरी, आज मुख्यमन्त्री शाहीले जिल्ला विपद् व्यवस्थापन समिति कालीकोटको बैठकमा सहभागी भएर विश्व महामारीका रुपमा फैलिएको कोरोना भाइरस कोभिड–१९ को अहिलेको अवस्थाबारे जानकारी लिनु भएको छ । कालीकोटमा कोभिड अस्पतालको निरीक्षण गरी यो संकटको व्यवस्थापनमा तदारुकताका साथ लाग्न समितिसहित कर्मचारीलाई निर्देशनसमेत दिनुभएको स्वकीय सचिव आचार्यले बताउनुभयो ।
मुख्यमन्त्री शाहीसँगै प्रदेश सरकारका भूमि व्यवस्था कृषि तथा सहकारीमन्त्री कुर्मराज शाही पनि गृह जिल्ला कालिकोट पुग्नुभएको मुख्यमन्त्रीको सचिवालयले जनाएको छ ।
