२७ असार २०८३, शनिबार
दैलेखः यही असार १८ गते सुर्खेतबाट कालिकोटतर्फ जाँदै गरेको क.प्र. ०२–००१ ख १०५५ नम्बरको फोर्स गाडी दुर्घटना भई कर्णाली नदीमा डुबेर बेपत्ता चार मध्ये तीनको शव फेला परेको छ ।
जिल्ला प्रहरी कार्यालय दैलेखका प्रमुख प्रहरी नायब उपरीक्षक श्रवणकुमार विकका अनुसार कर्णाली नदीमा बेपत्ता भएको चार दिनपछि मोहन्याल गाउँपालिका ६ कैलालीमा पचालझरना गाउँपालिका ९ कालीकोटका ६२ वर्षीय मेखे तिरुवाको शव फेला परेको थियो । त्यस्तै, असार २३ गते चौकुने गाउँपालिका ४ सुर्खेत डङ्डगेस्थित कर्णाली नदीको छालमा रास्कोट नगरपालिका २ कालीकोट खड्कागाउँ निवासी १८ वर्षीय सिर्जना खड्काको शव प्रहरीले फेला पारेको थियो ।
त्यसैगरी, निरन्तर खोज तलास गर्दै जाँदा आज नौ दिनपछि तुर्माखाँद गाउँपालिका २ अछाम जमगडास्थित कर्णाली नदीको किनारमा बेवारिसे अवस्थामा पञ्चपुरी नगरपालिका ८ सुर्खेत माझिगाउँ निवासी तुलाराम सुवेदी शव फेला प्रहरी नायब उपरीक्षक विकले बताउनुभयो । कर्णाली नदीको विभिन्न स्थान फेला परेका शव आफन्तको रोहवरमा सनाखत गरिएको बताउँदै उहाँले मृतक तुलारामका सहोदर भाई सहचालक रामप्रसाद सुवेदी र फोर्स गाडी अँझै भेटाउन नसकिएको जनाउनुभयो ।
उक्त फोर्स गाडी असार १८ गते चामुण्डाबिन्द्रासैनी नगरपालिका ७ दैलेखको साङगेतडास्थित दुर्घटनाग्रस्त भई कर्णाली नदीमा खसेको थियो । बेपत्ता व्यक्तिहरुसहित गाडीको खोजी कार्यमा रिभर भेहीकल म्याग्नेट, सोनार, ड्रोन र बोरेस्कोप क्यामरासहितको उच्च प्रविधियुक्त गोताखोर टोली, नेपाल प्रहरी, सशस्त्र प्रहरी बल तथा नेपाली सेना नौ दिनदेखि कर्णाली नदी आसपासका किनारामा खोजिरहेको जनाइएको छ ।
