२३ असार २०८३, बुधबार
सुर्खेतः यही असार १८ गते सुर्खेतबाट कालिकोटतर्फ जाँदै गरेको क.प्र. ०२–००१ ख १०५५ नम्बरको फोर्स गाडी दुर्घटना भई कर्णाली नदीमा डुबेर बेपत्ता चार मध्ये एक पुरुषको शव कैलाली जिल्लामा भेटिएको छ ।
मोहन्याल गाउँपालिका ६ कैलाली चिसपानीमा भेटिएको शव पहिचान गर्दा पचालझरना गाउँपालिका ९ कालीकोटका मेखे तिरुवा रहेको उनका छोरा रबिन्द्र तिरुवालाई उद्रित गर्दै जिल्ला प्रहरी कार्यालय दैलेखका प्रमुख प्रहरी नायब उपरीक्षक श्रवणकुमार विकले जानकारी दिनुभयो । उता ईलाका प्रहरी कार्यालय चिसापानी कैलालीका प्रमुख प्रहरी निरक्षक मिरा खड्काले पनि शव सनाखत गर्दा ६२ वर्षीय मेखे तिरुवा नै रहेको बताउनुभयो ।
प्रहरी नायब उपरीक्षक विकका अनुसार मृतक मेखेसहित हराएका रास्कोट नगरपालिका २ खड्कागाउँका सिर्जना खड्का, पञ्चपुरी नगरपालिका ८ सुर्खेत माझीगाउँका चालक तुलाराम सुवेदी, सहचालक रामप्रसाद सुवेदी र फोर्स गाडी अँझै भेटाउन सकिएको छैन । उक्त फोर्स गाडी चामुण्डाबिन्द्रासैनी नगरपालिका ७ दैलेखको साङगेतडास्थित दुर्घटनाग्रस्त भई कर्णाली नदीमा खसेको थियो ।
बेपत्ता व्यक्तिहरुसहित गाडीको खोजी कार्यमा रिभर भेहीकल म्याग्नेट, सोनार, ड्रोन र बोरेस्कोप क्यामरासहितको उच्च प्रविधियुक्त गोताखोर टोली, नेपाल प्रहरी, सशस्त्र प्रहरी बल र नेपाली सेना गरेर करिब १०० जना जनशक्ति पाँच दिनदेखि परिचालन छ तर आजसम्म भेटाउन नसकेको प्रहरी नायब उपरीक्षक विकले बताउनुभयो ।
