१७ जेठ २०८३, आईतबार
सुर्खेतः कर्णाली प्रदेशका मुख्यमन्त्री यामलाल कँडेलले कर्णाली समृद्धिको लागि साझा प्रयास जरुरी रहेको बताउनुभएको छ ।
कर्णाली प्रदेश योजना आयोगद्वारा आज सुर्खेत वीरेन्द्रनगरमा आयोजि कर्णाली प्रदेश विकास परिषद्को चौथो बैठकलाई सम्बोधन गर्दै मुख्यमन्त्री कँडेलले एकल प्रयासबाट विकास सम्भव नहुने तर्क गर्नुभयो । कर्णालीको उत्थान र विकासका लागि सबै पक्षले आफ्नो जिम्मेवारीलाई गम्भीरतापूर्वक निर्वाह गर्नुपर्ने उहाँको भनाई थियो ।
“यहाँको विकास निर्माणका कामलाई प्रभावकारी बनाउन सबै तहका सरकार तथा सरोकारवालाबीच साझा बुझाइ, समन्वय र सहकार्य आवश्यक छ, मुख्यमन्त्री कँडलले भन्नुभयो, “जनाताको जीवनस्तर सुधार गर्ने तथा उनीहरुलाई सन्तुष्ट बनाउने योजनालाई प्राथमिकता दिनुपर्दछ । जनतालाई खुसी बनाउने र उनीहरुको आवश्यकता पूरा गर्ने गरी योजना तथा कार्यक्रम सञ्चालन गर्नुपर्छ ।”
बजेट विनियोजनबाट विकास र समृद्धिका पक्षमा जनसमर्थन बढ्ने गरी प्राथमिकता निर्धारण गर्नुपर्नेमा जोड दिँदै प्रदेश तथा स्थानीय सरकारले आफ्नो क्षमता र स्रोतअनुसार सरकार खर्चमा मात्र केन्द्रित नभएर आम्दानी वृद्धि गर्ने विषयमा पर्याप्त ध्यान उहाँले सुझाउनुभयो । उत्पादन, रोजगारी र राजस्व वृद्धि गर्ने योजनामा जोड दिनुपर्ने मुख्यमन्त्री कँडेलको भनाई थियो ।
स्थानीय तहका अभिलेखहरु अझै व्यवस्थित रुपमा उपलब्ध हुन नसकेकोले तिनको व्यवस्थापन गर्न, प्रदेश र स्थानीय तहबीचको सम्बन्ध थप सुदृढ बनाउन प्रत्येक पालिकामा योजना बैंक निर्माण गर्नुपर्ने र त्यसका लागि प्रदेश सरकारले प्राविधिक सहयोग उपलब्ध गराउने जानकारीसमेत उहाँले दिनुभयो । बजेट वितरण र शासन शैलीमा सुधार गर्नुपर्नेमा जोड दिँदै मुख्यमन्त्री कँडेल अध्ययन, अनुसन्धान र तथ्यका आधारमा योजना निर्माणतर्फ लाग्न निर्देशन दिनुभयो ।
