२६ चैत २०८२, बुधबार
जुम्लाः जुम्लाबाट सुर्खेत आउदै गरेको एम्बुलेन्स दुर्घटनामा परी गम्भीर घाईते भएका दुई बिरामीलाई थप उपचारका लागि सुर्खेत ल्याइएको छ ।
हिमा गाउँपालिका ६ जुम्ला पातरखोलाका बिरामी ७१ वर्षीय कलबहादुर अधिकारी र वडा नं. ७ मर्चीगाउँ निवासी २० वर्षीय लोकेन्द्र शाहीलाई कालीकोट अस्पतालबाट थप उपचारका लागि कर्णाली प्रदेश अस्पताल सुर्खेतमा ल्याइएको हो । खाँडाचक्र नगरपालिका २ कालीकोट मान्मस्थित मेयर खोलानजिक बिरामी बोकेर जुम्लादेखि सुर्खेत आउँदै गरेको क.प्र.०१००१ झ ००२४ नं.को एम्बुलेन्स बुधबार राती ८ः१० बजे अचानक दुर्घटना हुँदा गम्भीर घाईते भएका थिए ।
घाईते मध्ये अधिकारीको दायाँ खुट्टाको तिघ्रा नजिक दुई ठाउँमा हड्डी भाँचिएकोले आइसियुमा राखेर उपचार भईरहेको र भोलि नै काठमाडौं रिफर गर्ने तयारी रहेको प्रदेश अस्पतालका सूचना अधिकारी अनिता ज्ञावलीले जानकारी दिनुभयो । उहाँका अनुसार अर्का घाईते शाहीको अवस्था सामान्य रहेको छ । दुवैको उपचार खर्च प्रदेश अस्पतालले नै व्यहोर्ने सूचना अधिकारी ज्ञावलीले बताउनुभयो ।
जिल्ला प्रहरी कार्यालय कालीकोटका प्रमुख प्रहरी नायब उपरीक्षक हिमबहादुर खत्रीका अनुसार दुर्घटनाका कारण एम्बुलेन्समा सवार बिरामी अधिकारीका छोरा ३२ वर्षीय भीमबहादुर अधिकारी र वडा नं. ७ निवासी एम्बुलेन्स चालक २६ वर्षीय शक्तिबहादुर शाहीको मृत्यु भएको थियो । भीमबहादुर बुबा कलबहादुरको उपचारका लागि एम्बुलेन्सको व्यवस्थापन गरेर सुर्खेत हिडेका थिए ।
