२९ फागुन २०८२, शुक्रबार
सुर्खेतः तिला गाउँपालिका ३ जुम्ला सार्कीबाडाकी २० वर्षीय अस्मिता नेपालीको उपचारको क्रममा सुर्खेत मृत्यु भएको छ ।
यही फागुन २५ गते कर्णाली स्वास्थ्य विज्ञान प्रतिष्ठान जुम्लामा एक शिशुको जन्म दिएकी नेपालीको स्वास्थ्य अवस्था निकै जटिल बनेपछि बिहीबार उनलाई नेपाली सेनाको हेलिकोप्टरमार्फत थप उपचारका लागि कर्णाली प्रदेश अस्पताल सुर्खेतमा ल्याइएको थियो । उपचारको क्रममा मृत्यु भएको मृतक नेपालीका आफन्त विर्ख नेपालीले जानकारी दिनुभयो । उनले जन्म दिएको नवजात शिशुको अवस्था भने सामान्य रहेको जुम्ला प्रतिष्ठानले जनाएको छ ।
नेपालीको स्वास्थ्य अवस्थामा सुधार नआएपछि प्रतिष्ठानको सघन कक्षमा राखेर उपचार गरिएको थियो । कर्णाली स्वास्थ्य विज्ञान प्रतिष्ठान शिक्षण अस्पताल जुम्लाका निर्देशक कमल थानीले बिरामीको अवस्था जटिल हुँदा उनको स्वास्थ्यमा थप सुधारका निम्ति राष्ट्रपति महिला उत्थान अन्तरगत हेलिकोप्टरमार्फत सुर्खेत पुर्याइएको र उपचारको क्रममा आज मृत्यु भएको छ ।
उहाँका अनुसार अस्मिताको मृगौला फोक्सोमा समस्या देखिएको थियो । तीन दिन अघि जुम्ला प्रतिष्ठानमा शिशुको जन्मदिएकी अस्मिता उपचारका लागि तल झारेको २४ घण्टा नपुग्दै उपचारकै क्रममा प्रदेश अस्पताल सुर्खेतमा अस्ताएकी छन् । मृत्यु भएपछि उनको शव परिवारले दाहासंस्कारका लागि कर्णाली राजमार्ग भएर आजै जुम्ला लगेका छन् ।
