२१ फागुन २०८२, बिहीबार
प्रतिनिधिसभा सदस्य पदको लागि आज सम्पन्न निर्वाचनमा कर्णालीमा ५२ दशमलव ९० प्रतिशत मत खसेको छ ।
निर्वाचन आयोग कर्णाली प्रदेश निर्वाचन कार्यालय सुर्खेतका सूचना अधिकारी नन्दराम चौलागाईले अनुसार यहाँका १२ निर्वाचन क्षेत्रमा सबैभन्दा बढी हुम्लामा ६४ दशमलव १५ प्रतिशत मत खसेको छ ।
त्यस्तै, डोल्पामा ६३ दशमलव १४, मुगुमा ५८ दशमलव ९०, रुकुमपश्चिममा ५८ दशमलव ४४, जुम्लामा ५६ दशमलव ६५, जाजरकोटमा ५६ दशमलव ६५, कालीकोटमा ४८ दशमलव ६२ र सल्यानमा ४४ दशमलव ४० प्रतिशत मत खसेको सूचना अधिकारी चौलागाईले जानकारी दिनुभयो ।
उहाँका अनुसार सुर्खेत क्षेत्र नं. १ मा ५४ दशमलव ५७, क्षेत्र नं. २ मा ५६ दशमलव ०३, दैलेख क्षेत्र नं. १ मा ५० दशमलव ५१ र क्षेत्र नं. २ मा ४३ दशमलव ०७ प्रतिशत मत खसेको छ । कुल दश लाख ३७ हजार दुई सय ५० मतदातामा पाँच लाख ५४ हजार तीन सय ४१ मतदाताले मात्र मत खसालेको प्रदेश निर्वाचन कार्यालय सुर्खेतले जनाएको छ ।
कर्णालीमा तीन लाख चार सय ४२ महिला र दुई लाख ५३ हजार आठ सय ९७ पुरुष मतदाताले प्रतिनिधिसभा सदस्य निर्वाचन २०८२ मा भाग लिएका छन् । चार लाख ८२ हजार नौ सय नौ मतदाताहरु यो निर्वाचनमा सहभागी हुन नसकेको बताईएको छ ।
