२५ माघ २०८२, आईतबार
कर्णाली प्रदेशसभाको दोस्रो कार्यकालको सातौं अधिवेशनको चौथो बैठक दश सेकेण्ड बसेर स्थगित भएको छ ।
आज बसेको उक्त बैठकमा प्रमुख प्रतिपक्ष दल नेपाली कम्युनिस्ट पार्टी (नेकपा)ले अनुपस्थित भई बहिस्कार गरेको गरेको थियो । राष्ट्रिय गानपश्चात् सभामुख नन्दा गुरुङले सातौं अधिवेशनको चौथो बैठकको कारवाही प्रारम्भ गर्नुभयो । त्यसको दश सेकेण्डपछि सभाको बैठकमा प्रमुख प्रतिपक्षी दलको उपस्थिति नदेखिएको भन्दै अर्को सूचना नभएसम्मका लागि बैठक स्थगित भएको जानकारी दिनुभयो ।
प्रमुख प्रतिपक्ष दल नेकपा कर्णाली प्रदेशसभा दल नेता मंगलबहादुर शाहीले सभामुखको कार्यक्षमता र कार्यसम्पादनप्रति गम्भीर प्रश्न उठाउँदै सभामा उपस्थित नभएको जानकारी दिनुभयो । उहाँले सभाप्रति भन्दा सभामुख सरकारप्रति वफादार भएको आरोप लगाउनुभयो । उहाँले भन्नुभयो, “सभालाई सरकारको मातहतको निकाय जस्तो गरेर चलाउने थालेपछि यसको स्वायत्तता र गरिमामाथि गम्भीर प्रश्न उठ्ने देखियो । तसर्थ बैठकमा उपस्थित हुनु औचित्य छैन भनेर हामी सभामा उपस्थित भएनौं ।”
सरकारले सभाको कामकारवाही प्रभावकारी र नियमसंगत सञ्चालन गर्ने विश्वास प्रतिपक्षी दललाई नदिलाएसम्म बैठक अगाडि बढ्न नसक्ने दल नेता शाहीले बताउनुभयो । उहाँका अनुसार सभामुख र सरकार प्रमुख दुवैले कार्यशैलीमा सुधार गरी अगाडि बढ्नुपर्छ ।
