१८ माघ २०८२, आईतबार
सुर्खेतः कर्णाली प्रदेश सरकारका मुख्यमन्त्री यामलाल कँडेलले संविधान मिचेर हुने कुनैपनि निर्णय प्रदेशलाई स्वीकार्य नहुने बताउनुभएको छ ।
कर्णाली प्रदेशसभाको दोस्रो कार्यकालको सातौ अधिवेशनको आज सुर्खेत वीरेन्द्रनगरमा बसेको पहिलो बैठकमा बोल्दै मुख्यमन्त्री कँडेलले संघीय सरकारसँग टक्राव नभई सम्मानजनक सहकार्य चाहेको बताउनुभयो । सदनमा बोल्दै उहाँले भन्नुभयो, “प्रदेश सरकार न कुनै वैकिल्पक व्यवस्था हो न संघीय सरकारको एकाई हो, यो त जनआन्दोलनको उपलब्धि र संविधानको मेरुदण्ड हो ।”
संघीय सरकारबाट बजेट प्राप्त हुने नाममा भएको पत्रचारमाथि हामी प्रदेश सरकारहरुको सामुहिक प्रतिवादले निर्णय सच्याउन तयार भएको जनाउँदै त्यसबाट केही सुधार भएको मुख्यमन्त्री कँडेलले बताउनुभयो । जेनजी आन्दोलनपश्चात् बनेको नागरिक सरकारको मुख्य काम आसन्न फागुन २१ गते चुनाव सम्पन्न गर्ने भनिएपनि चुनाव हुनेमा संशय रहेको उहाँको भनाई थियो ।
नेपाली कम्युनिष्ट पार्टी कर्णाली प्रदेशसभा दल नेता मंगलबहादुर शाहीले जेनजी आन्दोलनले ल्याएको परिवर्तनसँगै हरेक सच्चिन जरुरी रहेको बताउनुभयो । भ्रष्टाचारमुक्त र सुशासनयुक्त देश हुनुपर्छ भनेर सडकमा आएको युवा पुस्ताले व्यहोरेको क्षतिमा तत्कालीन सत्तासीन दललले जिम्मा लिनेमात्र नभई सबै दलले संस्कार, पद्धति र शैलीमा परिवर्तन ल्याउनुपर्नेमा जोड दिनुभयो ।
नेपाली काँग्रेस कर्णाली प्रदेशसभा दल नेता जीवनबहादुर शाहीले कुनै पनि देशमा न्यूनतम आवश्यकता पुरा नहुँदा त्यहाँ बेथिति धेरै हुने टिप्पणी गर्नुभयो । कुरा राम्रो र मिठो गरेर सुशासन नहुने भन्दै उहाँले सहि प्रणाली र पद्धतिको विकास एवं संस्थागत हुन सकेमात्र मुलुक सहि दिशामा जाने बताउनुभयो । आज देश रहने कि नरहने भन्ने चिन्ताको विषय बढेकोले यसमा सबै गम्भीर हुनुपर्ने उहाँको भनाई थियो ।
नेकपा एमाले कर्णाली प्रदेशसभा दलका प्रमुख सचेतक टेकराज पछाईले पुराना पार्टीहरु सबै गलत हुन् भन्ने भाष्य चल्नु दुर्भाग्य भएको बताउनुभयो । जेनजीहरुको आन्दोलनको मक्सद सहि हुँदाहुँदै त्यसमा संघीय व्यवस्था विरोधी शक्तिहरुले फाईदा उठाएको उहाँले जिकिर गर्नुभयो ।
राप्रपा प्रदेशसभा सदस्य सन्तोषी शाहीले सुशासनका नाममा नातावाद र कृपावाद हावी हुँदा त्यसको परिणामस्वरुप आजको परिस्थिति सिर्जना भएको बताउनुभयो । सभामुख नन्दा गुरुङले अर्को बैठक यही माघ १९ गते दिउसो ३ः०० बजे बस्ने जानकारी दिनुभयो ।
