१८ कात्तिक २०८२, बुधबार
सुर्खेतः कर्णाली प्रदेश सरकारका उद्योग, पर्यटन, वन तथा वातावरणमन्त्री सुरेश अधिकारीले कर्णालीलाई नेपालको मुख्य गन्तव्य बनाउने लक्ष्य राखेर प्रदेश सरकार अगाडि बढेको बताउनुभएको छ ।
‘जाउँ है बेगनास पोखरा प्रवद्र्धन कार्यक्रम’ लिएर सुर्खेत वीरेन्द्रनगर पुगेको होटल एण्ड रेस्टुरेन्ट एशोसियसन लेखनाथ पोखरा कास्कीको भ्रमण टोलीसँग आज भएको छलफलमा मन्तव्य व्यक्त गर्दै मन्त्री अधिकारीले पर्यटकी दृष्टिले कर्णाली र गण्डकी दुवै अथाह संभावना बोकेका प्रदेश भएको बताउनुभयो । उहाँले भन्नुभयो, “पूर्वाधारका हिसाबले कर्णाली कमजोर छ तर धार्मिक, ऐतिहासिक र प्राकृतिक पर्यटनको प्रचुर संभावना छ ।”
मन्त्री अधिकारीले बेगनास पोखरा र कर्णालीको पर्यटन प्रवद्र्धन एवं विकासमा सहयोग पुग्ने गरी प्रचारात्मक कार्यमा जोड दिनुपर्ने धारणा व्यक्त गर्नुभयो । कर्णालीमा पुगेको होटेल व्यवसायीहरुको टोलीले कर्णालीको आहा भन्ने चीज लिएर जान आग्रह गर्दै उहाँले अब मध्य पहाडी लोकमार्गले कर्णाली र गण्डकी प्रदेशको पर्यटन विकासमा सम्बन्ध सेतुको काम गर्ने बताउनुभयो ।
कर्णाली प्रदेश पर्यटन बोर्ड सदस्य तथा व्यवसायी पदमबहादुर शाहीले व्यवसायिक दक्षता र राज्यले निर्माण गर्ने अनुकुल वातावरणबाट पर्यटन प्रवद्र्धन हुने बताउनुभयो । उहाँका अनुसार पर्यटनले रोजगारी प्रदान गर्नुका साथै आर्यआर्जन तथा सरकारको राजश्व वृद्धिमा सहयोग पुग्छ ।
होटेल तथा रेष्टुरेन्ट एशोसियसन लेखनाथ पोखरा कास्कीका अध्यक्ष बीरभद्र कँडेलले पोखरा भ्रमण वर्ष २०२५ रहेर गरिएको भ्रमण अवलोकनले कर्णाली र बेगनासको सम्बन्ध विकास र पर्यटन प्रवद्र्धनमा सहयोग पुग्ने बताउनुभयो । उहाँका अनुसार एशोसियनको आयोजनामा यतिबेला बुटवल, बर्दिया र सुर्खेतको भ्रमण अवलोकन गरिएको छ ।
उक्त छलफल कार्यक्रममा उद्योग मन्त्रालयका निमित्त सचिव सुनिता केसी र वन निर्देशनालय सुर्खेतका निर्देशकले कर्णाली सरकारले पर्यटन विकासका लागि लिएको नीति, निर्माण गरेको पर्यटन गुरुयोजना, हालसम्म भएका प्रवद्र्धनका कार्यक्रम र आगामी रणनीति, योजना तथा तय गरिएको लक्ष्यका बारेमा आफ्नो प्रस्तुति राख्नुभएको थियो ।
