२४ भदौ २०८२, मंगलबार
सुर्खेतमा जेन जी प्रदर्शनकारीहरुको आन्दोलन उग्र बन्दै गएपछि जिल्ला प्रशासन कार्यालय सुर्खेतले जनधनको क्षति कम गर्न निषेधाज्ञा जारी गरेको छ । प्रशासन कार्यालयले आज अपरान्ह ४ः३० बजेदेखि अर्को आदेश जारी नहुञ्जेलसम्मका लागि निषेधाज्ञा जारी गरेको हो ।
स्थानीय प्रशासन ऐन, २०२८ (संशोधन समेत) को दफा ६ (क) बमोजिम सुर्खेत जिल्ला वीरेन्द्रनगर नगरपालिकाको रत्नराजमार्ग अन्तरगत सुब्बाकुनादेखि पश्चिम बाङ्गेसिमल र यसको उत्तर–दक्षिण तीन सय मिटरमा आवतजावतमा रोक लगाएको छ । तोकिएको सीमानाभित्र कसैले आवतजावत गर्न, कुनैपनि प्रकारको भेला, जुलुस, प्रदर्शन, सभा, बैठक, घेराउ गर्न नपाउने गरी निषेधाज्ञा जारी गरिएको सुर्खेतका प्रमुख जिल्ला अधिकारी जगदिश्वर उपाध्यायले जानकारी दिनुभयो ।
निषेधाज्ञा पूर्व प्रदर्शनकारीले सुर्खेतस्थित नापी कार्यालय, कर्णाली प्रदेश कोष तथा लेखा नियन्त्रकको कार्यालय, अख्तियार अनुसन्धान दुरुपयोग, कर्णाली प्रदेशसभा, मुख्यमन्त्री यामलाल कँडेलको सरकारी तथा वीरेन्द्रनगर नगरपालिका ६ भैरवस्थानस्थित नीजि निवास, नेपाली काँग्रेस, एमाले, माओवादी केन्द्र, राप्रपालगायतका पार्टीका कार्यालय समेत जलाएका छन् ।
त्यसैगरी, वीरेन्द्रगनगर नगरपालिका ७ ईत्रामस्थित काँग्रेस केन्द्रीय सभापति तथा पूर्व रक्षा तथा उपप्रधानमन्त्री पूर्णबहादुर खड्का र उहाँका भाई डम्बर खड्काको घरमा र वीरेन्द्रनगर नगरपालिकाका प्रमुख मोहनाया ढकालको नीजि निवासीमा आगजनी गरेका छन् । भूमि व्यवस्था, कृषि तथा सहकारीमन्त्री बिनोदकुमार शाहको सरकारी निवासमा आगजनी र उद्योग, पर्यटन, वन तथा वातावरणमन्त्री सुरेश अधिकारी, जलस्रोत तथा उर्जा विकासमन्त्री बिजया बुढाको सरकारी निवासमा प्रदर्शनकारीहरुले तोडफोड गरेका छन् ।
त्यस्तै, प्रदर्शनकारीहरुले वीरेन्द्रनगर नगरपालिका ६ र ४ स्थितको वडा कार्यालय र साँझ ७ः०० बजेतिर यहाँको शुभ होटलसमेत आगजनी र तोडफोड गरेका छन् ।
