२७ साउन २०८२, सोमबार
कर्णाली प्रदेश सरकारका मुख्यमन्त्री यामलाल कँडेलले सरकारी बजेट मैंले ल्याएको हो भन्ने प्रवृत्ति अन्त्य हुनुपर्ने बताउनुभएको छ ।
सुर्खेतपश्चिममा पर्ने चौकुने गाउँपालिका वडा ६ स्थित नवनिर्मित भवनको आज उदघाटन गर्दै मुख्यमन्त्री कँडेलले गाउँमा आउने विकास बजेटलाई मैंले ल्याएको हो भनेर दाबी गर्ने बेथिति मौलाउँदै गएको बताउनुभयो । गाउँमा आउने बजेट हामी सबै जनताकै करबाट आउने भएकाले कसैले व्यक्तिगत दाबी गर्न नहुने मुख्यमन्त्री कँडेलका भनाई थियो ।
“संघीय, प्रदेश, पालिका र वडाको बजेट हामी सबैले तिरेको करको हो । कसैको व्यक्तिगत सम्पति होइन,” उहाँले भन्नुभयो, “मैंले ल्याएको हो, मेरो योजना हो भनेर कसैले दाबी गर्ने र जनताले पत्याउने स्थिति बन्नुहुँदैन ।” उहाँका अनुसार योजना पार्ने समयमा सबै सक्रिय हुने तर योजना परेपछि बेवास्ता गर्नाले विकासको गतिमा कमी हुँदै आएको आएको छ ।
हाम्रो लागि आएको योजना हो भनेर बुझ्न सके नागरिकका निम्ति कार्यान्वयन भएका सबै आयोजना पनि दिगो हुने उहाँको भनाई थियो । मुख्यमन्त्री कँडेलले सोही क्षेत्रको निर्माणाधिन लखरपाटा खम्बागाडे मुरमुरी जामु सुनकाँडा सडकको निरीक्षण गनुभएको थियो । उहाँले समयमै सडक निर्माण कार्य पुरा गर्न सम्बन्धित निर्माण व्यवसायीलाई र सडक निर्माणमा आवश्यक सहयोग र सहजीकरण गर्न स्थानीयलाई आग्रह गर्नुभयो ।
