१२ असार २०८२, बिहीबार
सुर्खेतः कर्णाली प्रदेशको राजधानी सुर्खेत वीरेन्द्रनगरस्थित काँक्रेविहारमा धार्मिक, साँस्कृतिक, पुरातात्विक तथा ऐतिहासिक महत्वबारे ‘पर्यटन महोत्सव तथा विद्यार्थी सम्मेलन’ गर्ने तयारी भएको छ ।
वीरेन्द्रनगर नगरपालिका वडा नं. ९ सुर्खेतको आयोजनामा भोलि असार १३ गते काँक्रेविहार परिसरमा महोत्सव तथा सम्मेलन गरिने वडाध्यक्ष ऋषि गिरीले आज पत्रकार भेटघाटमार्फत जानकारी दिनुभयो । हिन्दू र बौद्ध संस्कृतिको सङ्गम मानिने काँक्रेविहारको खोज अनुसन्धान तथा पर्यटन महोत्सव र युवा, बालबालिका तथा विद्यार्थी सम्मेलन तयारीको सबै काम पुरा भएको उहाँले बताउनुभयो ।
“ऐतिहासिक, साँस्कृतिक, धार्मिक, पुरातात्विक तथा पर्यटकीय दृष्टिले अनुपम सम्पदाको रुपमा स्थापित काँक्रेविहारमा महोत्सव हुनेछ,” उहाँले भन्नुभयो, “यसको मूल लक्ष्य काँक्रेविहारको ऐतिहासिक, पुरातात्विक, सांस्कृतिक र धार्मिक पक्षको गहन अध्ययन, समीक्षा तथा प्रचारप्रसार गर्नु गराउनु हो ।” ऐतिहासिक, साँस्कृतिक, पुरातात्विक र पर्यटकीय महत्व विषयमा वक्तृत्वकला प्रतियोगिता (कक्षा ९–१२), सपनाको काँक्रेविहार शीर्षकमा चित्रकला प्रतियोगिता (कक्षा ६–८) र स्थानीयकला संस्कृति झल्किने नृत्य प्रतियोगिता (कक्षा १–५) बीच हुने वडाध्यक्ष गिरीले जनाउनुभयो ।
उक्त महोत्वसमा डा.राजाराम सुवेदीले प्राचीन बौद्ध विहारका रुपमा परिचित काक्रेविहारको साँस्कृतिक, पुरातात्विक, धार्मिक र ऐतिहासिक महत्वको विषयमा कार्यपत्र प्रस्तुत गर्ने र प्राध्यापक पदमलाल देवकोटा, कृष्णचन्द्र शर्मा र महेन्द्र मल्लले त्यसको टिप्पणी गर्ने कार्यक्रम रहेको उहाँले बताउनुभयो । यसबाट काक्रेविहारले सुर्खेत उपत्यकाको साँस्कृतिक पहिचान मात्र नभएर कर्णाली प्रदेशकै गौरवशाली अतित, धार्मिक सहिष्णुता र कलात्मक सम्पन्नताको प्रतीक बोकेको कुरा उजागर हुने जनाइएको छ ।
उहाँका अनुसार समाजका विभिन्न क्षेत्रमा योगदान गर्नुभएका महत्वपूर्ण व्यक्तित्वहरुलाई सम्मानका साथै विद्यालयस्तरीय विज्ञान तथा शैक्षिक प्रदर्शनी र स्थानीय थारु, भोटे, र अन्य आदिवासी समुदायहरूको समृद्ध साँस्कृतिक प्रस्तुतिहरु प्रदर्शन गरिने छन् । यसबाट स्थानीय समुदायमा साँस्कृतिक संरक्षण र स्वामित्वको भावना अभिवृद्धि हुने अपेक्षा गरिएको वडाध्यक्ष गिरीले बताउनुभयो ।
