११ असार २०८२, बुधबार
कर्णाली प्रदेश सरकारका मुख्यमन्त्री यामलाल कँडेलले मुलुक संघीय ढाँचामा जाँदा पनि केन्द्रीयताले थिचिरहेको बताउनुभएको छ ।
कर्णाली प्रदेश सरकार आर्थिक मामिला तथा योजना मन्त्रालयद्वारा आज सुर्खेत वीरेन्द्रनगरमा आयोजित ‘सार्वजनिक खर्च प्रणाली तथा वित्तीय नीति विश्लेषण छलफल कार्यक्रम’मा बोल्दै मुख्यमन्त्री कँडेलले मुलुक संविधान र संघीयताको मर्म अनुसार अगाडि बढ्न नसक्दा जनअपेक्षा पुरा हुन नसकेको धाराण व्यक्त गर्नुभयो । कर्णालीको समस्या र आवश्यकतालाई बुझेर सार्वजनिक गरिने तथ्य र त्यस अनुसारको प्रभावकारी कार्यान्वयनले मात्र यहाँको समृद्धि र विकास हुन सक्ने उहाँको भनाई थियो ।
मुख्यमन्त्री कँडेलले भन्नुभयो, “कर्णालीमा समस्या छन् र समाधान भएका छैनन् । यहाँको गरिबी अन्त्य गरी भविश्यमा यसलाई समृद्ध प्रदेश बनाउने नीति, कार्यक्रम तथा योजना निर्माणको उत्तम सुझाव लिन भनेर त विज्ञ चाहिएको हो । त्यसैले विज्ञहरुले आफ्नो विज्ञता प्रयोग गर्दै तथ्य र वस्तुनिष्ठ कार्यपत्र एवं प्रतिवेदन सार्वजनिक गर्नुपर्दछ ।”
उहाँले स्रोत, बजेट तथा खर्च सम्बन्धी अभ्यासको नीतिगत संस्थागत तथा प्रवृतिगत गणितीय तथा गुणात्मक विश्लेषण गरी आज प्रस्तुत गरिएका दुईवटा कार्यपत्रले कानूनी र संरचनागत ढाँचामा मेल खाए विज्ञहरुका सुझाव कार्यान्वयनमा आउनेसमेत बताउनुभयो । चाहिएजति बजेट कर्णालीले नपाएको र पाइएको बजेटसमेत खर्च गर्न नसकेको बताउँदै मुख्यमन्त्री कँडेलले शतप्रतिशत बजेट खर्च गर्न नसक्नु राष्ट्रिय समस्या भएको प्रतिक्रिया दिनुभयो ।
आर्थिक मामिला तथा योजनामन्त्री राजीवबिक्रम शाहले अरुको कुरा सुन्न नसक्नेले आफ्नो सुधार गर्न नसक्ने भन्दै राष्ट्र निर्माणमा साझा सोच र प्रयास आवश्यक रहेको बताउनुभयो । सामाजिक विकासमन्त्री घनश्याम भण्डारीले मुलुक खत्तम छ भन्ने भाष्यले देश उँभो गतिमा नलाग्ने बताउनुभयो । उहाँका अनुसार असल नियतले काम गरे क्रान्तिकारी भाषण आवश्यक छैन ।
