२६ जेठ २०८२, सोमबार
सुर्खेतः कर्णाली प्रदेश प्रज्ञा प्रतिष्ठान स्थापना तथा सञ्चालन गर्ने सम्बन्धमा व्यवस्था गर्न बनेको विधेयक प्रदेशसभामा टेबुल गरिएको छ ।
प्रदेशसभाको दोस्रो कायकोलको छैटौं अधिवेशनको चौधौं बैठकमा सभामुख नन्दा गुरुङको अनुमति अनुसार सामाजिक विकासमन्त्री घनश्याम भण्डारीलाई कर्णाली प्रदेशसभा नियमवाली २०८१ नियम ११२ को उपनियम ३ बमोजिम सभासमक्ष टेबुल गर्नुभएको हो । कर्णाली प्रदेशभित्रको भाषा, लिपि, कला, साहित्य, लोकसंस्कृति, लोकगाथा, लोकवार्ता र संगीतको अध्ययन, अनुसन्धान संरक्षण, प्रवद्र्धन तथा विकास गर्न उद्देश्यले मन्त्रालय उक्त विधेयक ल्याएको हो ।
त्यसैगरी, सभामुखको अनुमतिसँगै कर्णाली प्रदेश सरकार, भूमि व्यवस्था, कृषि तथा सहकारीमन्त्री बिनोदकुमार शाहीले प्रदेशसभा नियमावली २०८१ को नियम ११४ को खण्ड क बमोजिम कर्णाली प्रदेश जीवनाशक विषादी व्यवस्थापन सम्बन्धमा व्यवस्था गर्न बनेको विधेयकमाथि विचार गरियोस् भनि सभासमक्ष प्रस्ताव गर्नुभयो । विधेयकको सामान्य छलफलमा प्रदेशसभा सदस्य भीमप्रकाश शर्मा, कल्याणी खड्का र कलबहादुर हमालले भाग लिनुभयो ।
सभामुख गुरुङले कर्णाली प्रदेशसभा नियमावली २०८१ को नियम ११७ बमोजिम उक्त विधेयकमा संशोधनको सूचना पेशका गर्न चाहनु हुने सदस्यहरुका लागि ७२ घण्टाको समयसीमा प्रारम्भ भएको जानकारी गराउनुभयो । प्रदेशसभा सदस्य पूर्णबहादुर खत्रीले आकस्मिक समयमा उठाउनुभएको विषयमा प्रदेश सरकारको ध्यानाकर्षण गराउनुभयो । उहाँले सभाको अर्को बैठक आगामी असार १ गते आईतबार दिउसो ३ः०० बजे बस्ने जानकारी गराउनुभयो ।
