जुम्ला, माघ २८ गते ,
नेपालका पाँच विश्वविद्यालयहरूले शैक्षिक सहकार्य र अनुसन्धान साझेदारीलाई प्रवद्र्धन गर्न आपसी समझदारी पत्र (एमओयू) मा हस्ताक्षर गरेका छन् ।
मध्यपश्चिम विश्वविद्यालय, सुदुर पश्चिमाञ्चल विश्वविद्यालय, नेपाल खुला विश्वविद्यालय, पुर्वाञ्चल विश्वविद्यालय, र लुम्बिनी प्राविधिक विश्वविद्यालयबीच भएको यो सम्झौताले संयुक्त अनुसन्धान, विद्यार्थी र शिक्षक आदान प्रदान तथा अन्तर विषयात्मक कार्यक्रमहरू मार्फत उच्च शिक्षाको गुणस्तर सुधार गर्ने लक्ष्य राखेको छ ।
समझौता अनुसार, विश्वविद्यालयहरू पोस्ट ग्र्याजुएट तहका अनुसन्धान परियोजनाहरू, शिक्षक, कर्मचारी तथा विद्यार्थीहरूको आदानप्रदान कार्यक्रम र संयुक्त शैक्षिक कार्यक्रमहरूको विकासमा सहकार्य गर्नेछन् । साथै, संयुक्तरूपमा सेमिनार, सम्मेलन र अनुसन्धान परियोजनाहरू आयोजना गर्नुका साथै शैक्षिक स्रोत र प्रकाशनहरू आदानप्रदान गर्नेछन् ।
सम्झौता पत्रमा विश्वविद्यालयका उपकुलपति प्रा. डा. ध्रुव कुमार गौतम, सुदुर पश्चिमाञ्चल विश्वविद्यालयका उपकुलपति प्रा. डा. हेमराज पन्त , नेपाल खुला विश्वविद्यालयका उपकुलपति प्रा. डा. शिलु मानन्धर , पुर्वाञ्चल विश्वविद्यालयका उपकुलपति प्रा. डा. बिजु कुमार थपलिया, र लुम्बिनी प्राविधिक विश्वविद्यालयका उपकुलपति प्रा. डा. विनोद प्रसाद ढकाल गरी पाँचै विश्वविद्यालयका उपकुलपतिले हस्ताक्षर गरेका छन् ।
साथै पाँचै विश्वविद्यालयका रजिष्ट्रारहरु सुदुर पश्चिमाञ्चल विश्वविद्यालयका प्रा. डा. यज्ञराज पाठक, मध्यपश्चिम विश्वविद्यालयका प्रा. डा. शोभाखर कँडेल, नेपाल खुला विश्वविद्यालयका प्रा. डा. गोविन्द सिंह बिष्ट, पुर्वाञ्चल विश्वविद्यालयका श्री नीलमणि पोखरेल र लुम्बिनी प्राविधिक विश्वविद्यालयका प्रा.डा. रेज बहादुर भण्डारीज्यू सम्झौता कार्यक्रममा सहभागी भएका थिए ।
मध्य पश्चिम विश्वविद्यालयका अनुसार सुरुवाती सम्झौता अवधी पाँच वर्षको रहेको छ भने प्रत्येक पाँच वर्षमा स्वत नवीकरण हुने प्रावधान उल्लेख गरिएको छ । यदि कुनै विश्वविद्यालयले सम्झौताबाट बाहिरिन चाहेमा कम्तिमा छ महिना अघि सूचना दिनुपर्नेछ । सम्झौता सुदूरपश्चिम विश्वविद्यालयमा सञ्चालित अन्तर्राष्ट्रिय सम्मेलनमा भएको थियो ।
विश्वविद्यालय पदाधिकारीका अनुसार, यस साझेदारीले नेपालमा शैक्षिक तथा अनुसन्धानको क्षेत्रमा नयाँ आयाम थप्नेछ साथै राष्ट्रिय तथा अन्तर्राष्ट्रिय स्तरमा सहकार्यलाई प्रवद्र्धन गर्नेछ भने विद्यार्थी तथा शिक्षकहरूका लागि सिकाइ र नवीनताको अवसर बढाउने अपेक्षा गरिएको छ ।
