२९ बैशाख २०८१, शनिबार
कर्णाली प्रदेशको राजधानी वीरेन्द्रनगर सुर्खेतमा आज सम्पन्न ‘प्रथम ज्ञान कर्णाली हाफ म्याराथन’को उपाधि नरेन्द्रसिंह रावत र पुष्पा भण्डारीले हाँसिल गर्नुभएको छ ।
रावतले एक घण्टा ११ मिनेट २५ सेकेण्ड र भण्डारीले एक घण्टा २८ मिनेट १७ सेकेण्ड २१ किलोमिटर दूरी पार गर्नुभएको हो । पुरुषतर्फ दोस्रो हुने रामजी बस्नेतले एक घण्टा ११ मिनेट ४८ र तेस्रो हुने श्रीकेश राई एक घण्टा १३ मिनेट २३ सेकेण्डमा उक्त दुरी पार गर्नुभएको हो । त्यस्तै, महिलातर्फ हुने दोस्रो सिर्जना पाण्डेले एक घण्टा ३२ मिने ४३ सेकेण्ड र तेस्रो हुने राज्यलक्ष्मी रावलले एक घण्टा ३६ सेकेण्ड ४० मिनेटमा सो दूरी पार गर्नुभएको थियो ।
प्रतियोगितामा प्रथम, द्वितिय र तृतीय हुने महिला तथा पुरुष खेलाडीहरुलाई क्रमशः रु.५५, ३० र २० हजार नगद पुरस्कार तथा प्रमाणपत्र प्रदान गरिएको छ । पुरुष सबै नेपाली सेना रहेका छन् । महिलातर्फ भण्डारी सशस्त्र प्रहरी, पाण्डे नेपाली सेना र रावल जुम्लाका रहेका छन् । विजयी पुरुष तथा महिला खेलाडीहरुलाई कर्णाली प्रदेश सरकारका मुख्यमन्त्री यामलाल कँडेलले पुरस्कारसहित ट्रफी प्रदान गर्नुभएको थियो ।
पाँच किलोमिटर छात्रतर्फ प्रथम अजय विश्वकर्मा द्वितिय नवराज बानियाँ तृतीय रमेश बुढा र छात्रातर्फ प्रथम बिमला कार्की, दोस्रो पूर्णिमा बुढाथोकी, लक्ष्मी शाही तृतीय हुनुभएको थियो । प्रथम, द्वितिय र तृतीय हुन सफल छात्र तथा छात्राहरुलाई क्रमश रु.१०, सात र पाँच हजार नगद तथा प्रमाण पत्र प्रदान गरिएको छ ।
त्यस्तै, आजै सम्पन्न हाफ म्याराथन प्रतियोगितामा ४५ वर्षमाथिका खेलाडीमा प्रथम काठमाडौंका धर्म महर्जन, द्वितिय रेवत दाहाल र तृतीय गंगबहादुर पुनमगर हुनुभएको छ । उहाँहरुलाई क्रमशः रु.१५, १० र पाँच हजार नगद पुरस्कार तथा प्रमाणपत्र प्रदान गरिएको ‘प्रथम कर्णाली हाफ म्याराथन’का संयोजक देवकुमार सुवेदी जानकारी दिनुभयो ।
सशस्त्र प्रहरीका पुष्पा भण्डारी र नेपाली सेनाका रावत प्रतियोगिताको च्याम्पियसिप घोषणा हुनुभएको छ ।सो म्याराथनको व्यवस्थापन क्रियटिभ गञ्ज मिडिया एन्ड इभेन्ट म्यानेजमेन्टले गरेको थियो । कर्णालीको दौड संस्कृतिको विकाससँगै पर्यटन प्रवद्धन गर्न तथा यहाँका स्थापित धावकलाई प्रोत्साहन प्रोत्साहन गर्ने उद्देश्यले आयोजना गरिएको उक्त प्रतियोगितामा एक हजार बढी खेलाडीहरुले भाग लिएको आयोजक बताएको छ ।
