२३ बैशाख २०८१, आइतबार
नेपाल सरकारका उद्योग वाणिज्य तथा आपूर्तिमन्त्री दामोदर भण्डारीले नेपालको आर्थिक समृद्धिको ढोका दैलेखबाट खुल्ने बताउनुभएको छ ।
दैलेखको भैरवी गाउँपालिका १ जलजलेमा सुरु गरिएको पेट्रोलियम अन्वेषणको अन्तिम अन्वेषण कार्यअन्तरगतको आज ड्रिलिङ कार्यको उद्घाटन गर्दै मन्त्री भण्डारीले पेट्रोलियम पदार्थको अन्तिम अध्ययनले सफलता प्राप्त गर्ने र आर्थिक समृद्धिको ढोका दैलेखबाटै खुल्नेमा आशावादी रहेको बताउनुभयो । आयोजना स्थलमा नेपाल र चीनको झण्डा राखेर उहाँले औपचारिक उद्घाटन गर्नुभएको हो ।
मन्त्री भण्डारीले तत्कालीन प्रधानमन्त्री तथा नेकपा एमालेका अध्यक्ष के.पी.शर्मा ओलीको पालामा कार्य प्रारम्भ भएको आयोजना वर्तमान सरकारले पनि उच्च प्राथमिकतामा राखेर कार्यलाई तीव्रता दिएको बताउनुभयो । “सुखी नेपाली र समृद्ध नेपालको चाहना पुरा गर्नका लागि सरकारले विशेष महत्वका आयोजनाहरुलाई छिटो भन्दा छिटो कार्यान्वयनको चरणमा पुर्याउने तयारी गरिरहेको छ,” उहाँले भन्नुभयो ।
खानी तथा भू–गर्भ विभागका महानिर्देशक रामप्रसाद घिमिरेले अन्वेषणको अन्तिम अध्ययनले सकारात्मक प्रतिवेदन प्राप्त भएमा दैलेख नेपालको आर्थिक समृद्धि केन्द्र बन्ने जिकिर गर्नुभयो । “देश विदेशमा अन्वेषणको विषयले चर्चा पाएको छ,” उहाँले भन्नुभयो, “आम नेपालीमा खुसी छाएको छ । यसमा हामी पनि उत्साहित भएका छौँ ।”
ड्रिलिङ कार्यको औपचारिक उद्घाटन लगत्तै उद्योग मन्त्री भण्डारी, खानी तथा भू–गर्भ विभागका महानिर्देशक घिमिरे, प्रतिनिधि तथा प्रदेशसभा सदस्यहरुले आयोजना स्थलको अध्ययन र अवलोकन गर्नुभएको थियो । नेपालगञ्जबाट आयोजनास्थल दैलेखको जलजलेमा पुगेका एकसय ५० बढी ट्रकका समानहरु झारेर जडानको कार्य तत्कालै थालिएकोले काम छिटो भएको खानी तथा भू–गर्भ विभागले जनाएको छ ।
विभागका अनुसार आगामी ६ महिनामा अन्तिम अन्वेषण सम्पन्न हुनेछ । अध्ययन पछि कति परिमाणमा पेट्रोल र ग्याँस भण्डारण छ भन्ने कुरा पत्ता लाग्नेछ । आर्थिक हिसाबले उत्पादन योग्य भएको खण्डमा प्रशोधनसहितका अन्य प्रक्रियाहरु सुरु हुनेछन् । नेपाल र चीन सरकारबीच विसं.२०७५ सालमा भएको जिटुजी सम्झौता अनुसार चीन सरकारको करिब रु.दुई अर्ब ५० करोड अनुदान लागतमा अध्ययनको काम भइरहेको बताइएको छ ।
