२१ बैशाख २०८१, शुक्रबार
कर्णाली प्रदेश सरकारका मुख्यमन्त्री यामलाल कँडेलले अबको अभिभारा जनताको अवस्था बदल्ने भएको बताउनुभएको छ ।
नेकपा एमाले सुर्खेत पश्चिमको पञ्चपुरी नगरपालिकाको आज आयोजित दोस्रो नगर अधिवेशनको उद्घाटन कार्यक्रमलाई सम्बोधन गर्दै मुख्यमन्त्री कँडेलले मुलुकमा व्यवस्था बदलिएपनि जनताको अवस्था बदलिन नसकेको बताउनुभयो । “बिगत आन्दोलनको समय थियो । त्यतिबेला हरेकलाई आन्दोलनमा हिडायौं तर आज त्यो अवस्था छैन । आज विद्यालय निर्माण, बालबालिकाको शिक्षा, स्वास्थ्यलगायत हरेक नागरिकका हक अधिकारहरुलाई सुरक्षित गर्दैै लैजानुपर्ने अभिभारा हाम्रो काँधमा छ ।”
नयाँ नेपाल निर्माण र समृद्धिको अभियान अगाडि बढाउने जिम्मा नेकपा एमालेको काँधमा आएको बताउँदै उहाँले यो अभियानमा लामवद्ध भएर लाग्न पार्टी अगुवा कार्यकर्ताहरुलाई निर्देशन दिनुभयो । जनताको काम गर्न र साझा अभियानमा लाग्न त्यागको कुरा चाहिने उहाँको भनाई थियो ।
उहाँले भन्नुभयो, “हामी राजनीति जनताको सेवाका लागि गरिरहेका छौं । नेकपा एमाले निर्माणको अभियानमा जुट्ने पार्टी हो । निर्माणको अभियानलाई गन्तव्यमा पुर्याउन नगर÷गाउँ कमिटिले शिक्षा, स्वास्थ्य, कृषि, सडक, खानेपानी, विद्युत, सञ्चार, पर्यटनलगायका क्षेत्रको विकासका लागि योजना आयोगको काम गर्न सबै तहका पार्टी कमिटिमा छलफल हुनुपर्छ । अधिवेशनमा चहलपहल गरेर त्यसपछि मस्त आराम गर्ने काम कहिल्यै नगर्नुस् । आफ्नो व्यक्तिगत स्वार्थका लागि राजनीति गर्ने नेता कार्यकर्ता एमाले हुन सक्दैन ।”
चुनाव आउँदा खर्च पानीको व्यवस्था गर्ने गलत परिपार्टी अन्त्य गरेर जानुपर्नेमा जोड दिँदै उहाँले स्वाभिमान, इमान र व्यक्तित्वको राजनीति गर्न आग्रह गर्नुभयो । आजको व्यवस्थाले महिला, दलित, आदिवासी÷जनजाति, पिछडिएको, अल्पसंख्यक, सीमान्तकृत वर्गको अवस्थालाई बिगतभन्दा धेरै माथि ल्याएको भन्दै मुख्यमन्त्री कँडेलले संघीय लोकतान्त्रिक गणतन्त्रात्मक व्यवस्थाको संस्थागत विकासमा सहयोग पुग्ने कार्यक्रम एमालेले अगाडि बढाउने बताउनुभयो ।
