१६ भदौ २०८०, शुक्रबार
सल्यान जिल्लाका सुन्तलामा गुलाबी रंगको रोग देखिएपछि कर्णाली प्रदेश सरकारका भूमि व्यवस्था, कृषि तथा सहकारीमन्त्रीसहित विज्ञको टोली सुन्तला बगैंचामा पुगेको छ ।
राष्ट्रिय बाली रोग विज्ञान अनुसन्धान केन्द्र खुमलटारको प्रयोगशालामा सल्यानमा सुन्तला जातको फलफूलमा लागेको रोगको नमूना परीक्षण गर्दा पिङ्क डिजिज (गुलाबी रोग) पत्ता लागेको थियो । रोग देखिएलगत्तै किसानको समस्या समाधान गर्न उहाँ किसानसँग सरकार कार्यक्रमअन्तरगत एकीकृत प्रयोगशाला सुर्खेतका विज्ञसहितको प्राविधिक टोली लिएर शुक्रबार बागचौर नगरपालिका ९ सल्यानका सुन्तला किसानको बगैँचामा पुग्नुभएको हो ।
भूमि व्यवस्था कृषि तथा सहकारी मन्त्रालय कर्णाली प्रदेश नेतृत्व, एकीकृत कृषि प्रयोगशाला वीरेन्द्रनगर सुर्खेतको सहकार्य तथा कृषि विकास कार्यालय सल्यानको व्यवस्थापनमा शुक्रबार किसानसँग अन्तरक्रिया गर्दै मन्त्री शर्माले जिल्लाको पहिचानको रुपमा रहेको सुन्तला जातमा देखिएको समस्या समाधान गर्न सुन्तला बगैँचा सुदृढीकरण अभियान तथा बगैँचा व्यवस्थापन कार्यक्रम सञ्चालन गरिएको बताउनुभयो ।
सुन्तलाको पकेट क्षेत्र कोटमौलामा देखिएको रोगको उपचारको लागि प्राविधिक लिएर सम्बन्धित स्थलमा पुगिएको उहाँले बताउनुभयो । मन्त्री शर्माका अनुसार किसानहरुलाई तालिम दिएर रोग नियन्त्रणका लागि विषादी वितरण तथा प्रयोगको विषयमा बगैँचामै पुगेर कार्यक्रम अगाडि बढाइएको हो । सुन्तला बगैंचामा पुगेको सरकारी टोलीले रोग नियन्त्रणमा लिन तीन सय ५० किसानलाई कपर अक्सिक्लोराईडयुक्त विषादी वितरण गरेको छ ।
बढी ओसिलो र न्यानो वातावरण भएको आषाढ–भदौसम्म सुन्तलाका हाँगामा यो रोगको ढुसीले आक्रमण गर्ने कृषि विकास कार्यालय सल्यानका निमित्त कार्यालय प्रमुख रेशमकुमार बस्नेतले जानकारी दिनुभयो । “सुरुमा यो रोगले छोएको ठाउँमा पानीले भिजेको जस्तो देखिने तर पछि बिस्तारै रोगले ग्रसित हुँदै जान्छ” उहाँले भन्नुभयो, “वर्षा सकिएपछि बिस्तारै हाँगाको बोक्राको तन्तु मर्दै जान्छ र पछि सुक्न थाल्ने लक्षण देखिन्छ ।”
