२९ असार २०७८, मंगलबार
नवनियुक्त प्रधानमन्त्री शेरबहादुर देउवा पाँचौ पटक प्रधानमन्त्रीको जिम्मेवारी सम्हाल्न सफल हुनुभएको छ। गन्यापधुरा गाउँपालिका १, डडेलधुराका देउवाको हालको ठेगाना काठमाडौंको बुढानिलकण्ठ हो । विसं.२००३ साल जेठ ३१ गते डडेलधुरामा बाबु प्रसादसिंह देउवा र आमा द्रौपदीदेवी देउवाको कोखबाट उहाँको जन्म भएको थियो । देउवाको परिवारमा श्रीमती आरजु राणा र एक छोरा रहेका छन् । उहाँले स्नातकोत्तर तहको अध्ययन गर्नुभएको छ ।
राजनीतिक जीवन
प्रधानमन्त्री देउवा २०१७ सालमा राजा महेन्द्रले पञ्चायती व्यवस्था लागू गरेपछि राजनीतिमा सक्रिय हुनुभएको थियो । २०२८ सालमा उहाँ नेविसंघको पहिलो सभापति हुनुएको थियो। कांग्रेसको विभिन्न संगठनमा रहेर जिल्लादेखि केन्द्रसम्मको नेतृत्व देउवाले सम्हाल्नुभएको थियो ।
विसं.२०५९ सालदेखि नेपाली काँग्रेस विभाजन गरी नेपाली काँग्रेस (प्रजातान्त्रिक) को गठन गरी सभापतिका रूपमा पाँच वर्ष नेतृत्व सम्हाल्नुभएको थियो । विसं.२०६४ सालमा पुन काँग्रेससँग एकीकरणपछि बरिष्ठ नेताको हैसियतमा काम गर्दै आउनुभएको थियो। विसं.२०७२ को १३ औं महाधिवेशनबाट उहाँ नेपाली कांग्रेसको सभापतिमा चुनिनुभएको थियो ।
देउवाको संसदीय यात्राको इतिहास हेर्दा विसं.२०४८ को संसदीय निर्वाचन, मध्यावधि निर्वाचन २०५१, प्रतिनिधिसभा निर्वाचन २०५६ मा डडेलधुराबाट १ निर्वाचित हुनुभएको थियो। पहिलो संविधानसभा निर्वाचन २०६४ र दोस्रो संविधानसभा २०७० मा डडेलधुरा १ बाट उहाँ निर्वाचित हुनुभएको थियो। यस्तै संविधान निर्माणपछि प्रतिनिधिसभा सदस्य निर्वाचन २०७४ मा पनि देउवा डडेलधुराबाट निर्वाचित हुनुभयो ।
देउवाले यसअघि विसं.२०५२, २०५८, २०६१ र २०७४ मा गरी चार पटक नेपालको प्रधानमन्त्रीको भूमिका निर्वाह गरिसक्नुभएको छ । विसं.२०४८ सालमा गृहमन्त्री बन्नुभएका देउवा राजनीतिका क्रममा करिब ९ वर्ष जेल जीवन व्यतित गर्नुभएको थियो ।
उहाँले प्रजातान्त्रिक आन्दोलनका क्रममा पटक पटक प्रहरी हिरासत र लामो समय जेल जीवन समेत बिताउनुभयो। विसं.२०५७ सालको दशौं महाधिवेशनबाट नेतृत्वका लागि प्रयास गरेका उहाँले करिब दुई दशकपछि १३ औं महाधिवेशनमा तेस्रो प्रयासमा कांग्रेस सभापति बन्नुभयो । देउवा विसं.२०४८ सालदेखि निरन्तर रुपमा डडेलधुराबाट प्रतिनिधि सभा सांसदमा निर्वाचित हुँदै आउँनुभएको छ ।
