१० साउन शनिबार
सुर्खेतः कर्णाली प्रदेश सरकारका मुख्यमन्त्री यामलाल कँडेलले वर्तमान शिक्षा प्रणालीमा नवीनतम सुधार आवश्यक रहेको बताउनुभएको छ ।
वीरेन्द्रनगर नगरपालिका १२ सुर्खेतस्थित श्री अमरज्योति माध्यमिक विद्यालयको प्रशासनिक एवं शैक्षिक भवन निर्माण कार्यको आज शिलान्यास कार्यक्रममा बोल्दै मुख्यमन्त्री कँडेलले समय अनुसार शिक्षा प्रणालीमा आमूल सुधारको खाँचो रहेको बताउनुभयो । उहाँले भन्नुभयो, “हामी अझै पनि परम्परागत शिक्षण पद्धतिमा अडिएको छौं जहाँ विद्यार्थीले केवल किताब पढ्ने र परीक्षा पास गर्ने लक्ष्य राख्छन् । अहिलेको युग अनुसारको शिक्षाले मात्र विद्यार्थीलाई प्रतिस्पर्धी, सक्षम र उत्पादनशील बनाउन सकिन्छ ।”
मुख्यमन्त्री कँडेलले शिक्षा क्षेत्रमा भौतिक पूर्वाधारको सुधारसँगै गुणस्तरमा पनि ध्यान दिनुपर्ने सुझाउँदै व्यवहारिक, प्रविधिमैत्री र नवीन शिक्षण प्रणाली अवलम्बन गर्नुपर्नेमा जोड दिनुभयो । शिक्षालाई जीवनोपयोगी बनाउने गरी पाठ्यक्रम, शिक्षण विधि र मूल्याङ्कन प्रणाली परिमार्जन गर्नुपर्ने उहाँको भनाई थियो ।
मुख्यमन्त्री कँडेलले भन्नुभयो, “शिक्षामा रुपान्तरण ल्याउन नीतिगत सुधार, स्रोत व्यवस्थापन, सक्षम शिक्षक र पूर्वाधारको भूमिका महत्वपूर्ण हुन्छ । प्रदेश सरकारको तर्फबाट कर्णालीका विद्यालयहरुमा आवश्यक पूर्वाधार निर्माण, जनशक्ति व्यवस्थापन र गुणस्तरीय शिक्षाका लागि आवश्यक बजेटको व्यवस्थामा विशेष ध्यान दिन्छौं । कर्णाली जस्तो भौगोलिक रुपमा विकट प्रदेशको शिक्षाको विकासबाट दीर्घकालीन विकास सम्भव हुन्छ ।”
श्रीमान कन्स्ट्रक्सन हेटौँडा उपमहानगरपालिका ६ मकवानपुरले विसं.२०८३ पुष १५ गते निर्माण सम्पन्न गर्ने गरी शिलन्यास गरिएको ३३ कोठे उक्त शैक्षिक भवन कर्णाली प्रदेश सरकारको रु.पाँच करोड ८९ लाख २४ हजार आठ सय ३४ बजेट विनियोजन गरिएको जनाईएको छ ।
सामाजिक विकासमन्त्री घनश्याम भण्डारीले शिक्षा सामाजिक परिवर्तनको साधन हुनुपर्ने धारणा राख्दै त्यसका लागि हामी सबै एकजुट हुनुपर्नेमा जोड दिनुभयो । कार्यक्रममा वीरेन्द्रनगर नगरपालिका प्रमुख मोहनमाया ढकाल, उपप्रमुख नीलकण्ठ खनाल, शिक्षा विकास निर्देशनालय सुर्खेतका निर्देशक दिपा हमाललगायतको सहभागिता रहेको थियो ।
