२० असार २०८२, शुक्रबार
कर्णाली प्रदेश सरकारको आगामी आर्थिक वर्ष २०८२÷०८३ को बजेट सर्वसम्मतले पारित भएको छ ।
प्रदेशसभाको छैठौं अधिवेशनको आजको बसेको २५औं बैठकबाट विशेष प्रस्तावसहित बजेट सर्वसम्मतले पारित भएको हो । सभामुख नन्दा गुरुङले कर्णाली प्रदेशसभा नियमावली २०८१ नियम १४१ को उपनियम १२ बमोजिम आर्थिक मामिला तथा योजनामन्त्री राजीवबिक्रम शाहलाई आगामी आव.२०८२÷०८३ को समग्र बजेट पारित गरियोस् भनि सभामा प्रस्ताव गर्न समय दिनुभयो ।
सभामुख गुरुङको निर्देशनपछि योजनामन्त्री शाहले कर्णाली प्रदेश विनियोजन विधेयक र आर्थिक विधेयक, २०८२ लाई पारित गरियोस् भनी प्रस्ताव प्रस्तुत गर्नुभयो । उक्त प्रस्तावसँगै आगामी आव.२०८२÷०८३ को बजेट सर्वसम्मतले पारित भएको सभामुख गुरुङले घोषणा गर्नुभयो ।
बैठकमा मन्त्री शाहले जलस्रोत तथा उर्जा विकास मन्त्रालय अन्तरगत अर्थ वित्तिय व्यवस्थामा विनियोजित ११ करोड ५० लाख रकमलाई विभिन्न योजनाहरुमा विनियोजन गरी कार्यान्वयन गर्न प्रदेशसभामा विशेष प्रस्ताव पेस गर्नु भएको थियो ।
आगामी आर्थिक वर्षका लागि प्रदेश सरकारले असार १ गते रु.३२ अर्ब ९९ करोड ६६ लाख ५५ हजारको बजेट ल्याएको थियो । कुल विनियोजित बजेट मध्ये चालूतर्फ रु.सात अर्ब ७९ करोड ९१ लाख एक हजार (२३ दशमलव ६४ प्रतिशत) रु पूँजीगततर्फ रु.१९ अर्ब ९८ करोड २७ लाख १३ हजार (६० दशमलव ५५ प्रतिशत) बजेट सरकारले विनियोजन गरेको छ ।
