३० असोज २०८०, सोमबार
कर्णाली प्रदेश सरकारका मुख्यमन्त्री राजकुमार शर्माले नेपाल प्रहरीले अन्तर्राष्ट्रियस्तरसम्म आफ्नो छवि कायम गरेको बताउनुभएको छ ।
कर्णाली प्रदेश प्रहरी कार्यालय सुर्खेतद्वारा आज वीरेन्द्रनगर सुर्खेतमा आयोजित नेपाल प्रहरीको ६८औं स्थापना दिवस समारोहलाई सम्बोधनलाई मुख्यमन्त्री शर्माले अपराध अनुसन्धान तथा नियन्त्रण एवं रोकथाममा प्रहरीले खेलेको भूमिकालाई अन्तर्राष्ट्रिय जगत्ले मूल्याङ्कन गरेको जनाउनुभयो । उहाँले भन्नुभयो, “नेपाल प्रहरीले राष्ट्र निर्माण र जनताको शान्ति सुरक्षामा उत्कृष्ट काम गरेको छ । प्रहरी संगठनप्रति कृतज्ञता प्रकट गर्न चाहान्छु ।”
कर्णालीको कठिन भूगोल रहेर भौतिक संरचनाविहिन अवस्थामा पनि प्रहरीले गरेको कार्यप्रति उच्च प्रशंसा गर्दै मुख्यमन्त्री शर्मा भन्नुभयो, “बास नपाएर प्रहरीले काम गर्नुपर्ने अवस्थाले सरकारलाई गम्भीर बनाएको छ । यो समस्या समाधानमा लाग्छौं । आर्थिक समृसद्ध र सामाजिक न्यायबाट समुन्न समाज निर्माण हुने भन्दै उहाँले अँझै पनि नागरिकको शान्ति सुरक्षार्थ दत्तचित्त भएर लाग्न प्रहरीलाई निर्देशन दिनुभयो ।
आन्तरिक मामिला तथा कानूनमन्त्री कृष्णबहादुर जिसीले संघमा प्रहरी ऐन तथा प्रदेशमा प्रहरी सुपरीवेक्षण ऐन पारित भइसक्दा पनि प्रहरी समायोजन हुन नसक्नुले संविधान र संघीयता कार्यान्वयनमा आशंका उठ्न थालेको बताउनुभयो । उहाँले संविधान र संघीयताको परिपालना हुनुपर्नेमा जोड दिनुभयो । जिल्ला समन्वय समिति सुर्खेतका प्रमुख गंगाराम सुनारले प्रहरी जनताको सारथी बनेर काम गरेको अनुभूति प्रकट गर्नुभयो ।
वीरेन्द्रनगर नगरपालिकाका प्रमुख मोहनमाया ढकालले संवैधानिक सर्वोच्चता र विधिमा रहेर प्रहरी संगठनले गरेको कामले उत्कृष्टता प्रदर्शन गरेको जनाउनुभयो । विभिन्न चुनौतिका बाबजुद आफ्नो जिम्मेवारीको ओज प्रहरीले कायम राखेको उहाँको भनाई थियो । जिल्ला प्रशासन कार्यालय सुर्खेतका प्रमुख जिल्ला अधिकारी नारायणप्रसाद सापकोटाले शान्ति, सुरक्षा तथा अपराध अनुसन्धानमा नेपाल प्रहरीको महत्वपूर्ण भूमिका रहेको भन्दै नेपाल र नेपालीको शिर ननिहुरिने गरी काम गर्न सुझाउनुभयो ।
उक्त दिवस समारोहमा शान्ति, सुरक्षा र नागरिक हितमा उत्कृष्ट काम गरेको भन्दै प्रहरी महानिरीक्षक वसन्तबहादुर कुवँरको तर्फबाट मुख्यमन्त्री शर्माले कर्णाली प्रदेश प्रहरी कार्यालय सुर्खेतका प्रमुख प्रहरी नायब महानिरीक्षक भीमप्रसाद ढकाल र जिल्ला प्रहरी कार्यालय जाजरकोटका प्रहरी नायब उपरीक्षक सन्तोष रोकालाई सम्मान गर्नुभयो ।
त्यस्तै, दिवसका अवसरमा चित्रकला, निबन्ध प्रतियोगिता, भलिबल र ब्याटमिन्टन प्रतियोगितामा भाग लिई प्रथम, द्वितिय र तृतीय स्थान प्राप्त गर्ने प्रतियोगीहरुलाई पुरस्कृत गरिएको थियो भने राष्ट्र सेवाको सिलसिलामा आफ्नो जीवन आहुती दिने अमर सहिद प्रहरीका परिवारलाई सम्मान गरिएको थियो ।
