११ साउन २०८०, बिहीबार
कर्णाली प्रदेश सरकारले यहाँका चार सय ४० पशुपालक कृषकलाई रु.६८ लाख ७३ हजार ‘हेरालो भत्ता’ दिएको छ ।
प्रदेश सरकार भूमि व्यवस्था, कृषि तथा सहकारी मन्त्रालयले गत आर्थिक वर्ष २०७९÷०८० मा यहाँका हिमाली चार जिल्लाका भेडा च्याङ्ग्रापालक कृषकलाई ‘हेरालो भत्ता’ उपलब्ध गरेको हो । मन्त्रालयअन्तरगत पशुपंक्षी विकास निर्देशनालय सुर्खेतका निमित्त निर्देशक कृष्णप्रसाद पंगेनीका अनुसार ‘हेरालो भत्ता’ कार्यक्रम उच्च हिमाली जिल्ला डोल्पा, हुम्ला, मुगु र जुम्लामा लागु भएको थियो ।
उहाँले भन्नुभयो, “प्रदेश सरकारले खासगरी भेडा च्याङ्ग्रापालक किसानहरुलाई प्रति महिना रु.एक हजार पाँच सयका दरले वार्षिक रु.१८ हजार रकम उपब्लध गराएको छ । ५० भन्दा माथि भेडा च्याङ्ग्रा पालेका कृषकहरुलाई प्रोत्साहनस्वरुप प्रदेश सरकारले ‘हेरालो भत्ता’ दिएको हो । कार्यक्रम यो आर्थिक वर्षमासमेत निरन्तर रहेको बताउँदै निर्देशक पंगेनीले अहिले केही जिल्लामा ‘हेरालो भत्ता’का साथै औषधि र बन्दोबस्तीका समानहरु पनि उलब्ध गराउने सुविधा थपिएको छ ।”
निर्देशनालयले जुम्लाका दुई सय २५ कृषकलाई रु.३३ लाख वितरण गरेको छ । त्यस्तै, हुम्लाका एक सय नौ कृषकलाई रु.१५ लाख ६९ हजार, मुगुका ५३ कृषकलाई रु.दश लाख ५० हजार र डोल्पाका ५३ कृषकलाई रु नौ लाख ५४ हजार रकम प्रदान गरेको छ । प्रदेश सरकारले कृषि क्षेत्रमा युवा जनशक्तिको आकर्षण बढाउन र कृषकको जीवनयापनमा सहयोग पु¥याउने उद्देश्यसहित उक्त कार्यक्रम ल्याएको जनाइएको छ ।
