फागुन ४ गते । जुम्लाको पातारासी गाउँपालिका–६ वडीखोलीमा ट्याक्टर दुर्घटना हुँदा एक जनाको मृत्यु भएको छ ।
जिल्ला प्रहरी कार्यालयका अनुसार गएराति ७ बजे कर्णाली प्रदेश ००२००१ त ०४२७ नम्बरको ट्याक्टर दुर्घटना हुदा एक जनाको मृत्यू भएको हो । प्रहरी नायव उपरीक्षक प्रल्हाद कार्कीका अनुसार दुर्घटनामा मृत्यु हुनेमा पातारासी–२ का अन्दाजी ५२ वर्षीय अमिर बोहोरा रहेका छन् । अन्य घाइते हुनेमा पातारासी–३ का २९ वर्षीय सुर बुढा, १२ वर्षीय सरिता बोहोरा, ५० वर्षीय लोग बहादुर बोहोरा, ३० वर्षीय मायादेवी बोहोरा र ५० वर्षीय परेक बोहोरा रहेका प्रहरीले जनाएको छ । घाईतेको अवस्था सामान्य भएको र कर्णाली स्वास्थ्य विज्ञान प्रतिष्ठान शिक्षण अस्पतालमा उपचार भईरहेको छ ।
प्रहरी नायव उपरीक्षक कार्कीका अनुसार घटना स्थलमा रातिनै प्रहरी गएको थियो, घटनास्थलको प्रहरी मुचुल्का वनाई सकिएको र शव पोष्टमार्टमका लागि अस्पतालाई ल्याईदै गरिएको अवस्था छ । सो दुर्घटनाका ट्याक्टर चालक भने फरार भएका छन् । चालकको प्रहरीले खोजी कार्यजारी गरिरहेको छ ।
यस अघि माघ २ गते सो सड्कमा जीप दुर्घटना हुदा पातारासी १ कै एक जनाको ज्यान जानुका साथै १५ जना घाईते भएका थिए । सो क्षेत्रमा हिउँले वाटो कठिन अवस्थामा थियो । सो कारणले दुर्घटना हुन सक्ने अनुमान गरिएको भएपनि घटनाको अनुसन्धान भईरहेको प्रहरीले जनाएको छ ।
