२५ कात्तिक २०७९, शुक्रबार

जिल्ला प्रशासन कार्यालय सुर्खेतले मदिराजन्य पदार्थ बिक्री वितरण तथा सेवन कार्यलाई पूर्ण रोक लगाएको छ ।

प्रतिनिधिसभा तथा प्रदेशसभाको आसन्न मंसिर ४ गते हुने निर्वाचनको प्रचारप्रसार कार्य तीव्ररुपमा बढेकोले यसलाई स्वच्छ, निष्पक्ष, मर्यादित, भयरहित र शान्तिपूर्ण तवरबाट सम्पन्न गर्ने ध्येयले आजका मितिदेखि मदिराजन्य पदार्थ बिक्री वितरण तथा सेवन कार्यका पूर्ण रोक लगाईएको जिल्ला प्रशासन कार्यालय सुर्खेतका प्रमुख जिल्ला अधिकारी खगेन्द्रप्रसाद रिजालले जानकारी दिनुभयो ।

“निर्वाचन मतपरिणाम घोषणा नभएसम्म यस जिल्लामा मेला, पर्व, जात्रा, महोत्सव, खेलकुद, र अन्य मनोरञ्जनका क्रियाकलापहरु सञ्चालन गर्न दिईने छैन,” उहाँले भन्नुभयो, “मंसिर ४ गते मतदान हुनुभन्दा २४ घण्टा अगावै ग्याँस सिलिण्डर, पाईप, सकेट, प्रेसर कुकरजस्ता विष्फोटनमा प्रयोग हुन सक्ने सामग्रीहरुको ओसारपसार तथा बिक्री वितरणमा समेत रोक लगाउने निर्णय भएको छ ।”

निर्णयको पूर्ण परिपालना गर्न सुर्खेतवासीलाई जानकारी गरिएको बताउँदै प्रमुख जिल्ला अधिकारी रिजालले यसको प्रभावकारी कार्यान्वयन गर्न÷गराउन सुर्खेतस्थित सबै राजनीतिक दल, उद्योगी, व्यापार व्यवसायी, आम सञ्चार माध्यम र सर्वसाधरणमा अनुरोध गरिएको जनाउनुभयो ।