२५ असार २०७९, शनिबार
स्थानीय तह निर्वाचन, २०७९ मा भाग लिने सुर्खेत जिल्लाका २६ प्रतिशत उम्मेदवारले चुनावी खर्च बुझाएका छन् ।
गत वैशाख ३० गते सम्पन्न भएको स्थानीय तहको चुनावमा भाग लिएका यहाँका नौ स्थानीय तहका दुई हजार ८४ जना उम्मेदवारहरु मध्ये २६ प्रतिशतले मात्र चुनावी खर्च बुझाएका हुन् । दुई हजार ८४ मध्ये चुनावी खर्च बुझाउने ५५२ उम्मेदवार रहेको कर्णाली प्रदेश निर्वाचन कार्यालय सुर्खेतका सूचना अधिकारी निर्मला रेग्मीले जानकारी दिनुभयो ।
उहाँले भन्नुभयो, “हामीले पटक पटक निर्वाचन खर्च बुझाउन उम्मेदवारहरुलाई ताकेता गरेका थियौं तरपनि निर्धारित मितिसम्म मात्र २६ प्रतिशत उम्मेदवारहरुले चुनावी खर्च बुझाएका छन् ।” स्थानीय तह निर्वाचन ऐन २०७३ र नियमावली २०७३ को ढाँचामा उम्मेदवारले चुनावको परिणाम घोषणा भएको मितिले ३० दिनभित्र आफ्नो चुनावी खर्च जिल्ला वा प्रदेश निर्वाचन कार्यालयमा बुझाउनुपर्ने कानुनी प्रावधान रहेको छ ।
सूचना अधिकारी रेग्मीका अनुसार सुर्खेतमा हालसम्म गाउँपालिकाहरुमा क्रमशः चौकुनेबाट २०, चिङ्गाडबाट ३३, सिम्ताबाट ३६, बराहतालबाट ९९ जना उम्मेदवारहरुले चुनाव खर्च बुझाएका छन् । त्यस्तै, नगरपालिकाहरुमा क्रमशः गुर्भाकोटबाट १२, भेरीगंगाबाट ५७, पञ्चपुरीबाट ६६, वीरेन्द्रनगरबाट ११२ र लेकबेसीबाट ११६ उम्मेदवारहरुले निर्वाचन खर्च प्रदेश निर्वाचन कार्यालयमा बुझाएका छन् ।
जिल्ला समन्वय समिति सुर्खेतको एकजना उम्मेदवारले चुनाव खर्च बुझाएको उहाँले बताउनुभयो । कर्णाली प्रदेश निर्वाचन अधिकारी दुर्गाप्रसाद चालिसेले चुनाव खर्च बुझाउने ५५२ र नबुझाउने एक हजार ५३२ उम्मेदवारहरुको विवरणसहित आयोगमा सिफारिस गरेर पठाइने बताउनुभएको छ ।
