१२ बैशाख २०७९, सोमबार
आसन्न वैशाख ३० गते हुने स्थानीय तहको निर्वाचनका लागि सुर्खेतको वीरेन्द्रनगरमा पाँच दलका उम्मेदवारहरुले प्रमुख र उपप्रमुखमा मनोनयन दर्ता गरेका छन् ।
मनोनयन दर्ता गर्ने मुख्य दलका उम्मेदवारहरुमा नेपाली कांग्रेसबाट उपेन्द्र खड्काले वीरेन्द्रनगर प्रमुख र रामकुमारी थापाले उपप्रमुखमा मनोनयन दर्ता गराउनुभएको छ । त्यस्तै, नेकपा एमालेबाट मोहनमाया ढकाल (भण्डारी)ले प्रमुख र निलकण्ठ खनालले उपप्रमुखमा उम्मेदवारी दर्ता गराउनुभएको छ ।
त्यसैगरी, नेकपा (माओवादी केन्द्र)बाट प्रमुखमा राजेन्द्र गिरी र उपप्रमुखमा शान्ति ढकालले उम्मेदवारी दर्ता गराउनुभएको मुख्य निर्वाचन अधिकृतको कार्यालय वीरेन्द्रनगर सुर्खेतले जानकारी दिएको छ । यता नेकपा (एकीकृत समाजवादी) पार्टीको प्रमुखमा धना जिसी (शाही)ले उपप्रमुखमा थिर बहादुर रावतले उम्मेदवारी दर्ता गर्नुभएको छ ।
राष्ट्रिय प्रजातन्त्र पार्टीबाट मुकुन्द श्याम गिरीले प्रमुख र अन्जु बस्यालले उपप्रमुखमा र नगर प्रमुख पदका लागि युवा अनिल ढकालले स्वतन्त्र उम्मेदवारी दिनुभएको मुख्य निर्वाचन अधिकृतको कार्यालय वीरेन्द्रनगर सुर्खेतले जनाएको छ ।
