२० जेठ २०७८, बिहीबार
राष्ट्रिय जनमोर्चाबाट निर्वाचित गण्डकी प्रदेशसभा सदस्य कृष्ण थापा पदमुक्त हुनुभएको छ। उक्त पार्टीले उहाँलाई दलबाट निष्कासन गरेको जानकारी आज प्रदेशसभा सचिवालयमा जानकारी गराएको छ ।
सभामुख नेत्रनाथ अधिकारीले आज १ः०० बजे शुरु भएको प्रदेशसभा बैठकमा थापालाई दलबाट निष्कासन गरेको पत्र आएको जानकारी गराउँदै उहाँको ठाउँमा प्रदेशसभा सदस्य पद रिक्त रहेको बताउनुभयो ।
जनमोर्चाले यस अघि नै थापालाई साधारण सदस्य पनि नरहने गरी निलम्बन गरेको थियो । पार्टी नीति विपरीत सरकारलाई साथ दिने बताएपछि थापालाई प्रदेशसभा सदस्य पदबाटै निष्कासन गर्न प्रदेशसभालाई जानकारी गराएको जनमोर्चाका केन्द्रीय महासचिव मनोज भट्टले जानकारी दिनुभयो ।
यस अघि ६० सदस्यीय रहेको गण्डकी प्रदेशसभामा थापा पदमुक्त भएपछि अब प्रदेशसभा सदस्यहरुको संख्या ५९ रहने छ । राष्ट्रिय जनमोर्चाका तीन जना सदस्य रहेकामा अब प्रदेशसभामा २ जना सदस्यमात्र रहने भएका छन् । नेकपा एमालेबाहेकको दलको सरकारमा बनाउने निर्णय राष्ट्रिय जनमोर्चाले गरेपनि थापाले विपक्षी गठबन्धनलाई साथ नदिने सार्वजनिक रुपमा नै बताउँदै आउनुभएको थियो ।
