२४, बैशाख २०७८, शुक्रबार
बागमती प्रदेशमा रिक्त राष्ट्रिय सभा सदस्य पदको उपनिर्वाचनमा लागि आज उम्मेदवारी मनोनयन हुँदै छ । हेटौंडास्थित निर्वाचन अधिकृतको कार्यालयमा बिहान १० देखि ४ बजेसम्म उम्मेदवारी दर्ता गरिने निर्वाचन आयोग नेपालले जनाएको छ ।
नेकपा एमालेको ओली समूहमा प्रवेश गरेका रामबहादुर थापा बादललाई माओवादी केन्द्रले कारवाही गरेपछि बागमती प्रदेशमा उहाँको रिक्त भएको हो ।
उक्त पद पूर्तिका लागि निर्वाचन आयोगले जेष्ठ ६ गते मतदान हुने गरी चुनावको मिति घोषणा गरिसकेको छ। चुनावमा प्रदेशसभा सदस्य र पालिका प्रमुख र उपप्रमुखले मतदान गर्नेछन् । बागमती प्रदेशमा ११० सांसद र २३८ पालिका प्रमुख उपप्रमुख गरी कुल ३४८ जना मतदाता रहेका छन्।
विपक्षी गठबन्धन (काँग्रेस, माओवादी, एमालेकै नेपाल–खनाल पक्ष)ले खिमलाल देवकोटालाई उम्मेदवार बनाउने निर्णय गरेको छ । सत्तारुढ दल एमाले मनोनयन दर्ताको दिनसम्म पनि उम्मेदवार चयन गर्न सकेको छैन । यस अघि बादललाई उम्मेदवार बनाउने एमालेले तयारी गरेको थियो । तर एमालेको नेपाल पक्ष विपक्षी गठबन्धनमा उभिएपछि बादल उम्मेदवार बन्न हच्किएको स्रोतले बताएको छ ।
जित सुनिश्चित भएपछि मात्र उम्मेदवार बन्ने बादलले अडान लिएपछि एमाले स्थायी कमिटीको बिहीबारको बैठकले कुनै निर्णय लिन सकेन । एमालेभित्रको विवाद संवादतिर मोडिएकाले मनोनयन दर्ताको समयसम्म एमालेले कसलाई अगाडि सार्छ भन्न यसै सकिने अवस्था छैन ।
