१९ बैशाख २०७८, आईतबार
नोबेल कोरोना भाइरस (कोभिड–१९) को संक्रमण कर्णाली प्रदेशमा आज तीनजना कोरोना संक्रमतिहरुको मृत्यु भएको छ ।
मृत्यु हुनेमा सुर्खेत सिम्ता गाउँपालिका ८ का ३०, लेकबेसी नगरपालिका ८ का ६८ र पञ्चपुरी नगरपालिका ११ का ३३ वर्षीय पुरुष रहेको स्वास्थ्य सेवा निर्देशनालय कर्णाली प्रदेश सुर्खेतका निमित्त निर्देशक डा.रविन खड्काले जानकारी दिनुभयो । उहाँका अनुसार तीनै जना पुरुषको उपचारको क्रममा आजै प्रदेश अस्पताल सुर्खेतमा मृत्यु भएको हो ।
योसँगै कर्णालीमा कोरोना संक्रमणबाट मृत्यु हुनेको संख्या ५४ पुगेको छ । त्यस्तै, पछिल्लो २४ घण्टामा कर्णालीमा ४०८ जनाको एन्टिजेन परीक्षण गर्दा १५४ जना (३८ प्रतिशत) मा कोरोना संक्रमण पुष्टि भएको निमित्त निर्देशक डा.खड्काले बताउनुभयो ।
त्यस्तै, यो प्रदेशमा हालसम्म कोरोना संक्रमण पुष्टि भएका आठ हजार ७८१ संक्रमितहरु मध्ये पछिल्लो २४ घण्टामा ३१ जना डिस्चार्ज भएसँगै सात हजार ६०२ जना (८७ प्रतिशत) निको भएर घर फर्केका छन् । एक हजार ७८८ जना संक्रमितहरु प्रदेशका विभिन्न आइसोलेशनमा रहेको स्वास्थ्य सेवा निर्देशनालयले जनाएको छ ।
