१७ बैशाख २०७८, शुक्रबार
दोस्रो लहरको नोबेल कोरोना भाइरस ((कोभिड–१९) को संक्रमण बढ्दै जान थालेपछि त्यसको रोकथाम तथा नियन्त्रणका लागि नेकपा माओवादी केन्द्रबाट निर्वाचित कर्णाली प्रदेशसभा सदस्यहरुले आधा महिनाको पारिश्रमिक विपद कोषमा सहयोग गर्ने भएका छन् ।
नेकपा माओवादी केन्द्र कर्णाली प्रदेशसभा दलका नेता तथा मुख्यमन्त्री महेन्द्रबहादुर शाहीको अध्यक्षतामा बिहीबार साँझ बसेको संसदीय दलको बैठकले कोरोनाको रोकथाम, नियन्त्रण, उपचार तथा प्रतिकार्यका लागि आधा महिनाको पारिश्रमिक कर्णाली सरकारको विपद् कोषमा सहयोग गर्ने निर्णय भएको केन्द्रका प्रमुख सचेतक सीताकुमारी नेपालीले जानकारी दिनुभयो ।
त्यस्तै, बैठकमा दलसँग आवद्ध प्रदेशसभा सदस्यहरुले आ–आफ्नो निर्वाचन क्षेत्रमा प्रदेश सरकारका निकायहरु, स्थानीय तह, अन्य राजनैतिक दल, स्थानीय प्रशासन, स्वास्थ्यकर्मी, पत्रकार सञ्चारकर्मी, नागरिक समाजसँग समन्वय गरी ‘कोभिड–१९’ प्रतिकार्य, रोकथाम, नियन्त्रण तथा उपचारका लागि कामलाई प्रभावकारी बनाउन आवश्यक सहजीकरण, समन्वय एवं अनुगमन गर्ने निर्णय भएको छ ।
बैठकमा दल नेता एवं मुख्यमन्त्रीले कोरोनाको रोकथाम, नियन्त्रण, उपचार तथा प्रतिकार्यको काममा सरकारले गरिरहेको पहल र विकास निर्माण तथा चालु आर्थिक वर्षको बजेट कार्यान्वयनको अवस्थाका साथै समसामयिक राजनैतिक परिस्थिति र दलले खेल्नुपर्ने भूमिकाका बारेमा जानकारी दिनुभएको प्रमुख सचेतक नेपालीले बताउनुभयो ।
त्यसैगरी, बैठकमा नयाँ भेरियन्टसहितको कोरोना संक्रमणका कारण मृत्युवरण गर्नभएका नागरिकहरुप्रति भावपूर्ण श्रद्धाञ्जली एवं मृतकका आफन्तजनहरुप्रति गहिरो समवेदना व्यक्त गर्नुको साथै कोभिड संक्रमणका कारण बिरामी हुनुभएका दल सदस्य बिन्दमान बिष्टलगायत सबै बिरामीहरुको स्वास्थ्य लाभको कामना गरिएको छ ।
उहाँका अनुसार प्रदेश सरकारको आगामी आर्थिक वर्षको नीति तथा कार्यक्रम र बजेटमा सरकारले लिनुपर्ने नीति एवं प्राथमिकताका बारेमा बैठकमा सहभागी प्रदेशसभा सदस्यहरुले आवश्यक सुझाव दिएका थिए ।
