१६ माघ २०७७, शुक्रबार
कर्णाली प्रदेश प्रहरी कार्यालय सुर्खेत मातहतका विभिन्न जिल्ला प्रहरी कार्यालयहरुद्वारा सात फरार अभियुक्त पक्राउ गरिएको बताएको छ ।
फरार अभियुक्त पक्राउ अभियान अन्तरगत जिल्ला प्रहरी कार्यालय सुर्खेत लेनदेन मुद्दाका एक, सार्वजनिक मुद्दाका तीनजना अभियुक्त पक्राउ गरेको छ । त्यस्तै जिल्ला प्रहरी कार्यालय जुम्लाबाट वन मुद्दाको एक र कर्तव्य ज्यान मुद्दा दुईजना फरार अभियुक्तलाई पक्राउ गरिएको कर्णाली प्रदेश प्रहरी कार्यालय सुर्खेतका सहप्रवक्ता एवं प्रहरी उपरीक्षक माधवप्रसाद श्रेष्ठले जानकारी दिनुभयो ।
पक्राउ गरिएका अभियुक्तलाई सम्बन्धित जिल्ला अदालतमा बुझाईएको छ । त्यस्तै, वीरेन्द्रनगर नगरपालिका ४ सुर्खेत एकतानगर टोलस्थित भिमलाल भट्टराईको घरमा कोठा भाडामा आएका दुईजना युवालाई ३६० मिलिग्राम लागु औषधसहित पक्राउ गरिएको सहप्रवक्ता श्रेष्ठले बताउनुभयो ।
उहाँका अनुसार लागु औषध बेचबिखन कारोबार गरिरहेको भन्ने सूचना पाउने बित्तिकै प्रदेश ब्युरोको प्रहरी नायब निरीक्षक नारायण शर्मा को टोली कारोवारी रहेको स्थल पुगी पक्राउ गरेको गरेको थियो । पराल मुनि प्लाष्टिकको पुडियामा लुकाई छिपाई राखेको अवस्थामा लागु औषध ब्राउन सुगरसहित उनीहरुलाई प्रहरीले पक्राउ गरेको हो ।
“पक्राउ पर्नेमा खजुरा गाउँपालिका ८ बाँके जिल्लामा बस्ने २८ वर्षीय युवाहरु सब्बिर खाँ र सदाम खाँ रहेका छन्,” उहाँले भन्नुभयो, “उनीहरुबाट सेतो रङको १७ वटा नाईट्रोभेट जस्तो देखिने ट्याब्लेट र रु.१७ हजार ८५० नगद पनि बरामद गरिएको छ ।” पक्राउ परेका दुवैको आवश्यक अनुसन्धान थालिएको प्रदेश प्रहरी कार्यालय सुर्खेतले जनाएको छ ।
