१४ मंसिर २०७७, आईतबार
कर्णाली प्रदेश सरकारको प्रदेश नीति तथा योजना आयोगका उपाध्यक्ष डा.सर्वराज खड्काले पद तथा गोपनीयताको सपथ ग्रहण गर्नुभएको छ ।
कर्णाली प्रदेश सरकारका मुख्यमन्त्री महेन्द्रबहादुर शाहीसमक्ष आज उपाध्यक्ष डा.खड्काले पद तथा गोपनीयताको सपथ ग्रहण गर्नुभएको हो । मुख्यमन्त्रीसमक्ष उपाध्यक्ष खड्का र मुख्यमन्त्रीका समन्वय विज्ञमा नियुक्त झकबहादुर मल्ल दुवैले मुलुक र जनताको नाममा सपथ खानुभएको थियो ।
क्त सपथ ग्रहण कार्यक्रममा पत्रकारहरुसँग बोल्दै उपाध्यक्ष डा.खड्काले आजै पद बहाली गरेबाट प्रथमतः विकासको रणनीति तयार गर्ने, दोस्रो कानून संरचना र तेस्रो कोरोनका कारण आर्थिक मन्दीबाट कर्णालीलाई कसरी माथि उठाउने भन्ने विषयमा ध्यान दिएर विशेष जोडका साथ काम गर्ने बताउनुभयो ।
“योजनाले नै विकासलाई डोर्याउने भएकोले हामी शुरुमा त दिगो विकास रणनीति बनाउँछौं,” उहाँले भन्नुभयो, “संभावना नै संभावनाले भरिएको कर्णाली र यहाँको पर्यटन, कृषि, जल तथा जडिबुटी क्षेत्रको विकासमा जोड दिने नीति निर्माण गरिनेछ ।” डा.खड्कालाई आयोगको उपाध्यक्ष र मल्ललाई समन्वय विज्ञका रुपमा प्रदेश सरकारको मंसिर ११ गते बिहीबार बसेको मन्त्रिपरिषद् बैठकले नियुक्त गर्ने निर्णय गरेको थियो ।
