३२ असार २०८३, बिहीबार
सुर्खेतः कर्णाली प्रदेश सरकारले यहाँका सबै सार्वजनिक संघ संस्थामा भोलि सार्वजनिक विदा दिने भएको छ ।
मुख्यमन्त्री तथा मन्त्रिपरिषद्को कार्यालय कर्णाली प्रदेश सुर्खेतले आज एक सूचना जारी गर्दै ‘साउने संक्रान्ति तथा देउडा पर्व’को अवसरमा प्रदेशभर साउन १ गते विदा दिइएको बताएको छ । विसं.२०८२÷११÷२४ बसेको मन्त्रिपरिषद् बैठकको निर्णय अनुसार भोलि कर्णाली प्रदेशका सबै सार्वजनिक संघ संस्थाहरुमा हुने विदासम्बन्धी आज सूचना जारी गरिएको मुख्यमन्त्री कार्यालयका सचिव लक्ष्मीकुमार विकले जानकारी दिनुभयो ।
उहाँका अनुसार देउडालाई मानव दुःख, सुख मात्र होइन, आर्थिक, सामाजिक, राजनीतिक, साँस्कृतिक र मनोवैज्ञानिक विषयवस्तुलाई कलात्मकरुपले गोलाकृतिमा रहेर गीति लयमा शारिरीक हाउभाउ देखाउदै खेलिने मध्य तथा सुदूरपश्चिम नेपालको प्रचलित तथा चर्चित खेल मानिन्छ । साउन १ गतेलाई ‘साउने संक्रान्ति तथा देउडा पर्व’को रुपमा विशेष महत्व दिएर मनाउन र जीवन्त बनाइराख्न कर्णाली प्रदेश सरकारले बर्सेनि सार्वजनिक विदा दिँदै आएको सचिव विकले बताउनुभयो ।
