२९ जेठ २०८३, शुक्रबार
सुर्खेतः वीरेन्द्रनगरमा जारी यु–१९ महिला राष्ट्रिय क्रिकेट प्रतियोगिताको फाइनलमा मधेश प्रदेश प्रवेश गरेको छ । प्रतियोगितका कुल छ खेल मध्ये यसले पाँच खेल जितेर महत्वपूर्ण १० अंक जोड्दै एक खेल अगावै फाइनल प्रवेश गरेको हो ।
आज वीरेन्द्रनगर क्रिकेट मैदानमा भएको खेलमा मधेसले लुम्बिनी प्रदेशलाई २४ रनले पराजित ग¥यो । टस जितेर पहिले ब्याटिङ रोजेको मधेसले निर्धारित ओभरमा तीन विकेट गुमाएर १६१ रनको बलियो योगफल खडा गरेको थियो । १६२ को लक्ष्य पछ्याएको लुम्बिनीले २० ओभरमा चार विकेट गुमाउँदै १३७ मा सीमित भयो ।
पहिले ब्याटिङ गरेको मधेशका लागि ‘प्लेयर अफ दि म्याच’ प्रतिमा साह र ओपनर सना प्रवीनले उत्कृष्ट अर्धशतकीय इनिङ्स खेले । ओपनर एलिशा यादव पाँच रनमा आउट भएपछि क्रिजमा आएकी प्रतिमाले मात्र ४७ बलमा ३ चौका र ५ छक्काको मद्दतले अविजित ६८ रनको इनिङ्स खेल्नुभयो । त्यस्तै, सना प्रवीनले ५७ बलमा १० चौका प्रहार गर्दै ६२ रनको योगदान दिनुभयो ।
लुम्बिनीका लागि बलिङतर्फ आशना चौधरी र आयुषा भुसालले समान १–१ विकेट लिनुभयो । लक्ष्य पछ्याउने क्रममा लुम्बिनीका ओपनर सुप्रिया बुढा मगरले ५३ बलमा ४ चौकासहित सर्वाधिक ४४ रनमा अविजित रहनुभयो । कप्तान अञ्जली पाठकले १८ बलमा ५ चौका र १ छक्का प्रहार गर्दै तीव्र गतिमा ३२ रन जोड्नुभयो । चौथो नम्बरमा आएकी युनिशा सारु मगरले १४ र रितु रावलले अविजित १५ रन बनानुभयो । मधेसका लागि साक्षी कुमारी यादव, सुस्मिता कुमारी यादव, आरती महतो र प्रतिमा साहले समान १–१ विकेट लिए ।
अर्को खेलमा कोशी प्रदेशले गण्डकी प्रदेशमाथि रोमाञ्चक जित दर्ता ग¥यो । टस हारेर पहिले ब्याटिङको निम्तो पाएको कोशीले कमजोर ब्याटिङका बावजुद रञ्जना साउदको उत्कृष्ट बलिङको मद्दतमा गण्डकीलाई रोक्दै महत्वपूर्ण जित निकालेको हो । ८८ रनको सामान्य लक्ष्य पछ्याएको गण्डकी प्रदेश निर्धारित २० ओभरमा पराजित भयो । कोशीका लागि पूर्णिया राजवंशीले ३६ बलमा ५ चौका प्रहार गर्दै सर्वाधिक २७ रन बनाउनुभयो ।
कप्तान टीका शाहले १९ बलमा १५ रन जोड्नुभयो । गण्डकीका बलरहरुले बलिङ गर्दै कोशीलाई सस्तैमा समेट्न मुख्य भूमिका खेलेका थिए । जवाफी ब्याटिङमा उत्रिएको गण्डकीका कप्तान कुसुम गोदारले इनिङ्स खेल्दै ४३ बलमा ५ चौका प्रहार गरी अविजित ४२ रन बनाउनुभयो । यस्तै, चन्द्रमाया बरालले ३७ बलमा १७ रन जोड्दै गर्दा टोलीका अन्य ब्याटरहरु आउट र ३ जना ब्याटरहरु रन आउट भए ।
कोशीको जीतको मुख्य नायक बलर रञ्जना साउदले बलिङ गर्दै गण्डकीका मुख्य ब्याटरहरुलाई पेभिलियनको बाटो देखाइदिनुभयो । रञ्जनाले कप्तान टीका शाहको क्याचमार्फत कुसुम गोदारलाई सघाउनुका साथै पूर्णिया राजवंशी र खुसीकुमार राजवंशीलाई आफ्नै बलमा क्याच आउट गराउनुभयो । उहाँले दीपशिखा भुजेललाई बोल्ड र कृतिका धामीलाई एलबीडब्लू धरापमा पार्दै उत्कृष्ट प्रदर्शन गर्नुभयो । कोशीका रञ्जना साउद ‘प्लेयर अफ दि म्याच’ घोषित हुनुभयो ।
खेलमा घरेलु टोली कर्णाली बागमतीका अगाडि कमजोर बन्यो । लगातार पाँचौं खेलमा पराजित भएको कर्णालीविरुद्ध टस जितेर पहिले ब्याटिङ रोजेको बागमतीले निर्धारित २० ओभरमा १३० रनको सम्मानजनक योगफल खडा गरेको थियो । १३१ रनको विजयी लक्ष्य पछ्याएको कर्णाली प्रदेश बागमतीका बलर कृष्मा गुरुङको घातक बलिङसामु निरीह बन्नपर्यो । पहिले ब्याटिङ गरेको बागमतीका लागि मध्यक्रमकी ब्याटर लक्ष्मीमाया रुम्बा लामाले उत्कृष्ट इनिङ्स खेल्दै ४३ बलमा ६ चौकाको मद्दतले सर्वाधिक ४७ रन जोड्नुभएको थियो ।
यस्तै, विकेटकिपर प्रथा श्रेष्ठले ३३ बलमा ३ चौका प्रहार गर्दै ३० रन बनाउँदा छैटौँ नम्बरकी कृष्मा गुरुङले १५ बलमा अविजित १५ रन जोड्नुभयो । बलिङतर्फ कर्णालीका सोनिसा चन्द, पास्ना योञ्जन र सोबिका शाहीले १–१ विकेट लिए । १३१ रनको लक्ष्य पछ्याएको कर्णाली प्रदेशको सुरुवात निकै खराब रह्यो । टोलीका लागि कप्तान तिर्सना विश्वकर्माले एक्लै ४६ बलमा ७ चौका प्रहार गरी ४३ रनको इनिङ्स खेल्नुभयो ।
ओपनर सोबिका शाहीले ९ रन जोड्दा टोलीका चार जना ब्याटरहरु शून्य (डक) रनमा आउट भए । कर्णालीको इनिङ्सलाई कमजोर पार्ने बागमतीकी कृष्मा गुरुङ एक्लैले ५ विकेट लिँदै सोबिका शाही, उमा चौधरी, पास्ना योञ्जन, अन्जिला थापा र समिक्षा बिसीलाई पेभिलियनको बाटो देखाइदिनुभयो । यस्तै दिपिकाकुमारी बोहराले दुई तथा पूजा साउद र सम्भाव्या ढकालले १–१ विकेट लिए । अलराउन्ड प्रदर्शन गर्दै अविजित १५ रन र घातक ५ विकेट लिएकी बागमतीकी कृष्मा गुरुङ खेलको ’प्लेयर अफ दि म्याच’ घोषित हुनुभयो ।
