२३ जेठ २०७७ शुक्रबार
कर्णाली प्रदेशका सातजना कोरोना संक्रमित उपचारपश्चात् आज घर फर्केका छन् ।
कर्णाली प्रदेशमा अस्पताल सुर्खेतमा उपचार गराईरहेका उनीहरु कोरोनामाथिको विजय लिएर आज घर फर्केका हुन् । पुनः परीक्षणपश्चात् कोरोना भाइरसको रिपोर्ट नेगेटिभ आएपछि उनीहरुलाई घर फर्काईएको कर्णाली प्रदेश अस्पताल सुर्खेतका कोरोना रोग सम्पर्क व्यक्ति डा.के.एन पौडेलले जानकारी दिनुभयो ।कोरोना रोग निको भएर घर फर्कनेहरुमा दैलेखका एक र छ जना सुर्खेतको रहेको सम्पर्क व्यक्ति डा.पौडेलले बताउनुभयो ।
कोरोनामाथि विजय प्राप्त गर्नेहरुमा वीरेन्द्रनगर नगरपालिका १ धारापानीका १६ वर्षीय उमेश कठायत, वडा नं. ३ तातापानीका २६ वर्षीय यामराज सोनी, वडा नं. ८ का १७ वर्षे लक्ष्मण राना, वडा नं.४ का ३७ वर्षीय धनबहादुर बस्याल, वडा नं. ९ लाटीकोइलीका ११ वर्षीय रमेश सुनार र महाबु गाउँपालिका १ दैलेखका २६ वर्षीय दीपक सावन रहेका छन् । एकजना महिलाको नाम र ठेगाना नखुलेको अस्पतालले जनाएको छ ।
कर्णालीमा शुक्रबारसम्म ४८९ जनामा कोरोना संक्रमण देखिए भने कोरोनाले भने कोरोना भाइरस रोगका कारण यहाँका दुई व्यक्तिको मृत्यु भइसकेको छ । कर्णालीमा कोरोना संक्रमणबाट मृत्यु हुने पहिलो व्यक्ति दुल्लु नगरपालिका–११ खागितडा दैलेख निवासी ३५ वर्षीय युवा थिए । उनको यही जेठ १७ गते शनिबारका दिन क्वारेन्टिनमै मृत्यु भएको थियो । त्यस्तै, दोस्रो व्यक्ति पञ्चपुरी नगरपािलका १ हाँसे सुर्खेतका २० वर्षीय युवाको जेठ २२ गते बिहीबारका दिन कोरोना संक्रमणबाट मृत्यु भएको थियो । उनलाई कोरोना संक्रमण नभएको भनेर घर पठाएपछि बिहीबार बिहान २ बजे घरमै मृत्यु भएको थियो ।
कोरोनामाथि विजय गरेर घर फर्किनेरूलाई कर्णाली प्रदेशका सामाजिक विकासमन्त्री दल रावलले आज बधाई दिनुभएको छ । उनीहरुलाई मन्त्री रावल, प्रदेश अस्पतालका निर्देशक डा.डम्मर खडका, स्वास्थ्य निर्देशक रिता भण्डारी, अन्य स्वास्थ्यकर्मी, सञ्चारकर्मी, सुरक्षाकर्मीसहितको सहभागितामा औपचारिक विदाइ गरिएको थियो ।
