२२ जेठ २०७७ बिहीबार
कर्णाली प्रदेशमा नोबेल कोरोना भाइरस (कोभिड–१९) बाट संक्रमित हुनेको संख्या ३८९ पुगेको छ । आज दैलेखमा एकैदिन ११३ जनामा कोरोना पोजेटिभ पुष्टि भएको छ । जसमा ७२ जना नारायण नगरपालिकाका मात्र छन् ।
कर्णाली स्वास्थ्य विज्ञान प्रतिष्ठान जुम्लाले गरेको आरटी पिसिआर परीक्षणबाट दैलेखका १०५ र मुगुको एक जनामा कोरोना पोजेटिभ रिपोर्ट आएको कर्णाली प्रदेश सरकार सामाजि विकास मन्त्रालय स्वास्थ्य सेवा महाशाखाका प्रमुख डा.लक्ष्मीनारायण तिवारीले जानकारी दिनुभयो । यसमा दैलेख नारायण नगरपालिका ६४ पुरुष र ५ महिला गरी ६९ जना रहेको उहाँले बताउनुभयो ।
त्यस्तै, दैलेख देवलकाँडाका १२, सोतका नौ, मानटाकुराका साता, भगनीका पाँच, साडुका दुई र बाँसकोटका एक जना रहेका छन् । त्यसैगरी, प्रदेश अस्पताल सुर्खेत र पशुपंक्षी रोग अन्वेषण प्रयोगशालामा गरिएको आरटी पिसिआरमा नारायण नगरपालिका दैलेखका तीन र नौमुले गाउँपालिकाका पाँच जनामा कोरोना पोजेटिभ पुष्टि भएको डा.तिवारीले जनाउनुभयो ।
बुधबारसम्म कर्णालीको संक्रमित संख्या २७५ थियो । आज संक्रमित हुने ११३ दैलेख र एक जना मुगुको व्यक्तिसँगै कर्णालीका कोरोना संक्रमित व्यक्तिको संख्या ३८९ सामाजिक विकास मन्त्रालय स्वास्थ्य सेवा महाशाखाले जनाएको छ । कोरोना भाइरसको संक्रमण अनपेक्षित रुपमा दैलेखमा फैलिएपछि कर्णाली प्रदेश सरकारको ध्यानाकर्षण भएको छ ।
