१९ जेठ २०७७, सोमबार
कर्णाली प्रदेशमा नोबेल कोरोना भाइरस (कोभिड–१९) बाट ७५ जना नयाँ कोरोना संक्रमित थपिएका छन् ।
कर्णाली स्वास्थ्य विज्ञान प्रतिष्ठान जुम्लामा आरटी पिसिआर परीक्षण गरिएकाहरु मध्य ४३ र प्रदेश अस्पताल तथा पशुपंक्षी रोग अन्वेषण प्रयोगशाला सुर्खेतमा परीक्षण गरिएका मध्य ३२ जनामा कोरोना पोजेटिभ पुष्टि भएको कर्णाली प्रदेश सरकार सामाजिक विकास मन्त्रालय जनस्वास्थ्य शाखाका प्रमुख नवराज कँडेलले जानकारी दिनुभयो । ७५ जना थपिएसँगै कर्णालीमा कोरोना संक्रमित व्यक्तिको संख्या १९८ पुगेको उहाँले बताउनुभयो ।
कर्णाली स्वास्थ्य विज्ञान प्रतिष्ठान जुम्लामा आईतबार राति १०ः०० बजे आईपुगेको रिपोर्ट अनुसार दैलेखको नारायण नगरपालिका, सिमडा, सोत, साडु, जुकेपानी र दुल्लु गरेर २४ जनामा कोरोना पोजेटिभ देखिएको हो । त्यस्तै, जुम्लाको हिमा गाउँपालिकामा ८ र सिंजा गाउँपालिका ९ जना गरी १७ तथा जिल्ला प्रहरी कार्यालय जुम्लाका दुई जना सुरक्षाकर्मीमा कोरोना संक्रमण देखिएको उहाँले जनाउनुभयो ।
त्यस्तै सुर्खेत प्रयोगशालामा गरिएको परीक्षणमा दैलख नारायण नगरपालिकाका १६, महावु गाउँपालिकाको १, सल्यान बनगाड कुपिण्ड नगरपालिकाका १० र सुर्खेत बराहताल गाउँपालिकाका ५ जना व्यक्तिमा कोरोना संक्रमण पोजेटिभ पुष्टि भएको शाखा प्रमुख कँडेलले बताउनुभयो । मन्त्रालयको जनस्वास्थ्य शाखाका अनुसार जुम्लासँगै कर्णालीका ६ जिल्लामा कोरोना संक्रमण फैलिएको छ ।
